Քիչ առաջ «Ժամանակ» օրաթերթի գլխավոր խմբագիրը «Առաջին լրատվական»-ին մեկնաբանել է Բելլա և Սեդրակ Քոչարյաններն ընդդեմ «Ժամանակ» օրաթերթի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արայիկ Մելքումյանի կայացրած դատական ակտը։
«Ես հումորով եմ վերաբերվում դատարանի այսօրվա վճռին։ Միայն ասեմ, որ ՀՀ երկրորդ նախագահի տարբեր տարիների գործունեության վերաբերյալ անակնկալները չեն ուշանա։ Ռոբերտ Քոչարյանի ու նրա ընտանիքի առանձին անդամների գործունեությունը Հայաստանում և մեր երկրից դուրս մշտապես գտնվելու է իմ դիտակետում։
Իհարկե, վիճարկելու ենք դատարանի այսօր կայացրած որոշումը վերաքննիչ դատարանում, ուստի առայժմ վաղ է խոսել, թե ով ում որքան գումար պետք է վճարի։
Հասկանում եմ, որ Քոչարյանը մինչ օրս այնքան գթասիրտ ու տղամարդ չի գտնվել, որ իր ահռելի ունեցվածքից բաժին հանի մանկատներին, ուստի եթե դատական ողջ գործընթացի ավարտին այնուամենայնիվ պարզվի, որ մենք գումար պետք է վճարենք, և մեր վճարած գումարը, Քոչարյանի մամլո խոսնակի խոսքի համաձայն, նվիրաբերվելու է հայ որբերին, կհամարենք, որ բարի գործ ենք արել»,- ասաց Արման Բաբաջանյանը։