«Հայկական ժամանակ» թերթի թողարկման պատասխանատու Հայկ Գևորգյանի կարծիքով՝ «Ժամանակ» օրաթերթի դեմ Բելլա և Սեդրակ Քոչարյանների հայցը մասնակի բավարարելու վերաբերյալ դատարանի որոշումը միանգամայն կանխատեսելի էր։ «Դատարանի այդ որոշումը անխուսափելի է։ Նրանք ունեն հստակ նպատակ. նպատակը արդարությունը չէ, այլ ոլորտի բոլորին հայտնի մի քանի տպագիր պարբերականներին զսպելը»,- ասում է Հայկ Գևորգյանը։
Հիշեցնենք, որ դատարանը բավարարել է 1 մլն դրամ վիրավորանքի և 2 մլն զրպարտության համար պահանջվող գումարի հայցը՝ ամբողջովին մերժելով փաստաբանական ծառայության համար պահանջվող երեք միլիոն դրամի պահանջը։
Հայկ Գևորգյանը համոզված է, որ պայքար պետք է տարվի լրատվամիջոցների ազատությունը սահմանափակող բոլոր միջոցների դեմ։ Թեև համոզված է, որ Վճռաբեկ դատարանը անփոփոխ է թողելու այս որոշումը, սակայն հորդորում է չհուսահատվել և հասնել մինչև եվրոպական դատարաններ։
«Պետք է որոշում կայացրած դատավորը վերադարձնի գումարը, իսկ պետությունը պետք է «Ժամանակ»-ի բարոյական վնասը փոխհատուցի»,- ասում է Հայկ Գևորգյանը։
