Վրացական News Georgia կայքի փոխանցմամբ, վրացական ընդդիմության առաջնորդներից, խորհրդարանի նախկին խոսնակ Նինո Բուրջանաձեն Կիևում տված մամլո ասուլիսի ժամանակ հերքել է այն մեղադրանքը, թե ինքը ռուսամետ քաղաքական գործիչ է.
«Ես համարվում եմ վրացամետ քաղաքական գործիչ, որը կարծում է, որ Վրաստանի համար սկզբունքային է արևմտյան երկրների հետ շատ սերտ և ռազմավարական համագործակցությունը։ Միևնույն ժամանակ, Վրաստանի համար սկզբունքային ու կենսական են համարվում Ռուսաստանի հետ նորմալ հարաբերությունները։
Վրաստանը պետք է կարգավորի իր հարաբերությունները Ռուսաստանի հետ և թույլ չտա ռազմական միջամտության կրկնություն։ Դա շատ կարևոր է նրա համար։
Ռուսաստան հաճախ մեկնելու հետ կապված՝ Բուրջանաձեն հայտարարել է, որ նախորդ տարի միայն 3 անգամ է եղել Մոսկվայում»։
Բուրջանաձեն քննադատել է նաև նախագահ Միխեիլ Սաակաշվիլիին. «Հենց Սաակաշվիլիի կառավարման ժամանակաշրջանում՝ 2008 թվականին, տեղի ունեցավ Ռուսաստանի հետ պատերազմը, որով նա վերստին բազաների տիրացավ, իսկ ՆԱՏՕ-ին Վրաստանի անդամակցությունը հետաձգվեց։
Վրաստանն այնքան ժամանակ չի անդամակցի ՆԱՏՕ-ին, քանի դեռ ռուսական տանկերը գտնվում են Թբիլիսիի կենտրոնից 20 րոպեանոց ճանապարհի վրա, և մինչև այդ հակամարտությունը չկարգավորվի»։
Բուրջանաձեն Վրաստան է վերադառնալու հունիսի 7-ին։
Հիշեցնենք, որ մայիսի 27-ին Սաակաշվիլին, անդրադառնալով Բուրջանաձեի ու նրա որդու միջև կայացած սկանդալային հեռախոսազրույցին, հայտարարել էր.
«Բուրջանաձեի և նրա համակիրների թիկունքում կանգնած են կայսերական մեծ հավակնություններ ունեցող երկրի (Ռուսաստանի) մեծ բանակը, անվտանգության մեծ ծառայությունը, կաշառքի ու նավթի մեծ պաշարները, ինչից էլ նրանք կորցնում են գլուխները: Եթե իշխանափոխության պլանների հղացումը վերաբերեր միայն տեղական ոչնչություններին, ապա ես նրանց լուրջ չէի ընդունի: Բայց երբ մենք գիտենք, թե ովքեր են կանգնած այդ պլանների ետևում, լուրջ ենք ընդունում նահանջել չցանկացող այդ ուժերին»:
