Իշխանությունները չեն պատրաստվում կազմել որևէ պատվիրակություն, որը կերկխոսի ՀԱԿ-ի կազմած 5 հոգանոց պատվիրակության հետ։ Այս մասին այսօր լրագրողների հետ հանդիպման ժամանակ հայտարարեց ԱԺ ՀՀԿ-ական պատգամավոր Մկրտիչ Մինասյանը։ Նրա խոսքով, երկխոսություն միշտ էլ եղել է ոչ միայն ՀԱԿ-ի, այլև մյուս բոլոր քաղաքական ուժերի հետ՝ ԶԼՄ-ների միջոցով, հայտարարությունների տեսքով և այլ։
«Երկխոսություն՝ որպես այդպիսին՝ եղել է, մինչև հիմա չեն նստել խոսել, բայց երկխոսությունը եղել է»,- հայտարարեց Մ. Մինասյանը՝ որպես այդ՝ արդեն եղած երկխոսության դրական արդյունք վկայակոչելով ՀԱԿ-ի ներկայացրած երեք պահանջների բավարարումը։ Իսկ արտահերթ ընտրություններ անցկացնելու օրակարգով և ՀԱԿ-ի առաջ քաշած ձևաչափով, ըստ Մ. Մինասյանի, երկխոսություն չի կարող լինել։
Իր հետ բանավիճող քաղաքագետ Հմայակ Հովհաննիսյանի հարցին՝ հնարավո՞ր է, որ իրենց այս հայտարարություններից հետո Սերժ Սարգսյանը հանկարծ «ավելի բարի» գտնվի և երկխոսության պատվիրակություն կազմի, Մ. Մինասյանը պատասխանեց, թե քաղաքականությունը պրոցես է և ինչ-որ բաներ կարող են փոխվել նաև իրենց մոտեցումներում։ «Բայց այս հարցի հետ կապված այդպիսի բան ես չեմ պատկերացնում»,- ասաց Մ. Մինասյանը։