«Ամերիկայի ձայնի» փոխանցմամբ՝ Ամերիկյան Huffinghton Post պարբերականն անդրադարձել է ONEArmenia կազմակերպության Shift:Tech անվանումը ստացած վերջին նախաձեռնությանը:
Հոդվածի հեղինակ Քրիստոֆեր Ադամյանը պարբերականում հրապարակված իր հոդվածում նշում է, որ ONEArmenia-ի կողմից իրականացվող յուրաքանչյուր նախագիծ կառուցվածքային խորը փոփոխություններ է իրականացնում Հայաստանում։
«Գովազդի ոլորտում ղեկավար պաշտոն զբաղեցնող գործարար Պետրիկ Սարգսյանը ONEArmenia-ն հիմնադրել է 2012 թվականին՝ նպատակ հետապնդելով գործի դնել երկրի ինտելեկտուալ և մշակութային ներուժը և նպաստել հայ երիտասարդ սերնդի պաշտպանությանը կոռուպցիայից ու հետխորհրդային բոլոր երկրներում առկա բացասական մթնոլորտից»,- հոդվածում գրում է Ադամյանը, որն այնուհետ վերհիշում է հայ ժողովրդի հին ու նոր պատմության որոշ փաստեր:
Ըստ հոդվածագրի՝ պատմական այս բոլոր իրադարձությունների հետևանքով շատ հայեր դարձել են մռայլ, ավելացել է Հայաստանից արտագաղթողների թիվը, երկրում անկառավարելի է դարձել կաշառակերությունը:
Հեղինակը կարծում է, որ Սարգսյանին ու ONEArmenia-ի նրա գործընկերներին բավական կարճ ժամանակահատվածում հաջողվել է միավորել համախոհ ձեռնարկատերերին, մշակույթի ոլորտի գործիչներին, այդ թվում՝ ձեռնարկատեր Ջեյմս Թուֆենկյանին:
Ադամյանն իր հոդվածում գրում է, որ ONEArmenia-ի հիմքում ընկած են համացանցի միջոցով հասարակության լայն զանգվածների ներգրավումը հասարակության հանդեպ ծառացած խնդիրների հետազոտության և լուծման գործին՝ «քրաուդսորսինգի», ինչպես նաև նույն սկզբունքով ֆինանսավորման հայթայթման՝ «քրաուդֆանդինգի» օգտագործման գաղափարները, որոնց միջոցով հնարավոր է դառնում հավաքել ֆինանսական միջոցներ՝ մարդասիրական, բնապահպանական ու տեխնոլոգիական ոլորտի համար անհրաժեշտ նախագծերն իրականացնելու համար:
Ըստ հեղինակի՝ հատկանշական է, որ նախագծին տրամադրվող ֆինանսական յուրաքանչյուր նվիրատվություն բացառապես զերծ է կոռուպցիոն երևույթներ առաջացնելուց, ինչը հնարավոր ներդրողների համար նախագծի ամենագրավիչ բնութագրերից է:
Հոդվածում ասվում է, որ կազմակերպության բազմաթիվ նախագծերից առավել գրավիչ էր Shift։Culture մշակութային նախագիծը, որին մասնակցության դիմումներ էին ուղարկվել ինչպես Հայաստանից, այնպես էլ աշխարհի ամենատարբեր անկյունների հայկական սփյուռքից: Այս նախագիծն ունեցել է այնպիսի հաջողություն, որ Սարգսյանը նախաձեռնել է ONEArmenia կազմակերպության ներկայիս SHIFT:Tech նախագիծը, որը, ըստ հոդվածագրի՝ «բաց կոչ է՝ Հայաստանում մշակելու համաշխարհային շուկայի համար նախատեսված բջջային ծրագիր»:
«Հայաստանը 99 տոկոս գրագիտություն ունեցող երկիր է, որտեղ գործազրկությունը կազմում է 36 տոկոս: Ցանկանում եմ ուշադրություն հրավիրել Հայաստանի մեծ հաջողություններ գրանցած տեղեկատվական տեխնոլոգիաների ոլորտի վրա, որն արդեն իսկ երկիր է բերել հարյուր միլիոնավոր դոլարի ծավալով գումարներ»,- ասում է ONEArmenia-ի հիմնադիր Սարգսյանը: