«Առաջին լրատվական»-ը ՀԱԿ-ի տնտեսական հանձնախմբի անդամ Վահագն Խաչատրյանին խնդրեց գնահատել այսօր ՀՀԿ երկու ներկայացուցիչների հայտարարությունները, կարծիքները ՀԱԿ-իշխանություն երկխոսության, կազմված պատվիրակության վերաբերյալ և ներկայացնել ՀԱԿ-ի պատասխանն ու անելիքներն այս պարագայում։
Հիշեցնենք, որ այսօր ՀՀԿ մամուլի խոսնակ Էդվարդ Շարմազանովը հայտարարություն էր տարածել, որում մասնավորապես նշվում էր՝ «ընդդիմության կողմից արտահերթ ընտրությունների առաջարկը որքան անհիմն է, այնքան էլ վնասակար սկսված դրական զարգացումները արգելակելու տեսանկյունից», և «ընդդիմադիր դաշտի մոնոպոլիստի դիրքերից ոչ մի տեղ չտանող առաջարկություններով հանդես գալով՝ ՀԱԿ-ը չի կարող ներդրում ունենալ ժողովրդին հուզող խնդիրների լուծման գործում»։
Իսկ ՀՀԿ խմբակցության ղեկավար Գալուստ Սահակյանը նույնիսկ «տուն-տունիկ» համարեց ՀԱԿ-ի՝ պատվիրակություններով երկխոսելու առաջարկն ու արդեն հստակ կազմով պատվիրակությունը։
«Երկխոսողն իրենք չեն։ Մենք պաշտոնապես դիմել ենք իշխանություններին։ Մենք սպասում ենք պաշտոնական պատասխանի։ Իրենք թող ձևակերպեն. եթե դա ձևակերպում են որպես պաշտոնական պատասխան՝ խնդրեմ։ Իսկ Գալուստ Սահակյանի կամ Շարմազանովի ասածները ընդամենը հերթական հայտարարություններ են»։
Վահագն Խաչատրյանը փաստեց, որ իշխանության տարբեր ներկայացուցիչներ հաճախ իրար հակասում են, և կարծիք հայտնեց, որ «նրանք քաղաքական գործընթացներին նույնիսկ չեն տիրապետում այսօրվա իրավիճակում, և չեն էլ պատկերացնում, թե ինչ կարող է լինել, եթե մեր առաջարկած տարբերակով երկխոսություն չսկսվի»։
«Այդ նույն Գալուստ Սահակյանն ու Շարմազանովը մեկ տարի առաջ կամ վեց ամիս առաջ նույն Մարտի 1-ի, քաղբանտարկյալների վերաբերյալ տարբեր բնույթի հայտարարություններ էին անում, այնպես որ, մենք կսպասենք իրենց ղեկավարի տեսակետին, հայտարարությանը»,- նշեց Վահագն Խաչատրյանը և հավելեց, որ սպասել չի նշանակում, որ երկար են սպասելու.
«Խելամիտ ժամկետ կա, որի ընթացքում մենք կփորձենք հասկանալ՝ իրենք ինչ վերջնական դիրքորոշում ունեն, պատրա՞ստ են երկխոսելու, թե՞ ոչ։ Եթե իրենք այդ մոտեցումներն են ցուցաբերում, նշանակում է, որ խուսափում են, պատրաստ չեն երկխոսելու»։