Իրավապաշտպան Վարդան Հարությունյանը ի պաշտպանություն Նիկոլ Փաշինյանի հրավիրված մամուլի ասուլիսի ժամանակ հայտարարեց, որ «Հայկական ժամանակ» օրաթերթի գլխավոր խմբագիր Նիկոլ Փաշինյանն ունի հստակ արտահայտված քաղաքական հայացքներ և անազատության մեջ է հայտնվել իր հայացքների համար: Վարդան Հարությունյանը նշեց, որ իշխանությունը պարտավոր է անազատության մեջ հայտնված մարդու անվտանգությունը ապահովել: Իրավապաշտպանը լրագրողների ուշադրությունը հրավիրեց այն փաստին, որ նույնիսկ քնած ժամանակ կարող են հարձակվել Նիկոլ Փաշինյանի վրա: Վարդան Հարությունյանը նշեց, որ բացի հրապարակայնությունից և մամուլից՝ չկա որևէ լծակ՝ պաշտպանելու Նիկոլ Փաշինյանին: «Կարծում եմ, որ նրան՝ որպես ԶԼՄ ներկայացուցչի, հրապարակախոսի և քաղաքական գործչի, պաշտպանելը մեր յուրաքանչյուրի գործն է՝ անկախ քաղաքական համոզմունքներից և հայացքներից, անկախ այն բանից՝ կիսում են նրա գաղափարները, թե ոչ. ես դրանում կասկած չունեմ: Կոչ եմ անում հատկապես նրանց, ովքեր չեն կիսում Նիկոլի հայացքները, գալ այսօր՝ ժամը 15. 00-ին Սարյանի արձանի մոտ և մասնակցել ի պաշտպանություն Նիկոլի կազմակերպված ակցիային»,- ասաց Վարդան Հարությունյանը: Նա հիշեցրեց, որ Երկրորդ համաշխարհային պատերազմում բանաստեղծ Մարտին Նիմյոլլերը ողջունել էր ֆաշիզմի մուտքը և լռում էր, երբ ֆաշիստները բռնություններ էին գործադրում այլոց նկատմամբ: Հետագայում, երբ այդ բանաստեղծը հայտնվել էր բանտում, ոչ ոք նրան չկարողացավ պաշտպանել, որովհետև բոլորին տարել էին: Ըստ իրավապաշտպանի՝ որպեսզի հերթը չհասնի մյուս լրագրողներին, մենք պարտավոր ենք այսօր պաշտպանել Նիկոլին:
