Քրեական դատավարության օրենսգրքի փոփոխությունների ուժի մեջ մտնելուց հետո իրավակիրառ պրակտիկայում դատախազությունն անընդհատ հանդիպում էր օրենսդրական բացթողումների, հակասությունների, քանի որ ՀՀ Քրեական օրենսգիրքը չէր բարեփոխվել: Այժմ այն եվրոչափանիշներին համապատասխանեցնելու փորձ է արվում: Այդ մասին «Հայելի» ակումբում ասաց գլխավոր դատախազի տեղակալ Մնացական Սարգսյանը, որի հեղինակած՝ Քրեական օրենսգրքում փոփոխություններ անելու նախագծի խորհրդարանական քննարկումը համընկավ նաև համաներման հետ և որոշակի ազդեցություն ունեցավ այդ գործընթացի վրա:
Նշյալ նախագծով նախատեսվում է պատժի խստացում՝ առանձնապես ծանր հանցագործությունների համար, և նվազ ծանր հանցագործությունների դեպքում՝ պատժի նվազեցում: Ըստ պարոն Սարգսյանի՝ գործող օրենսգրքում պարադոքսալ դրույթներ կան, որոնք ենթակա են փոփոխման. օրինակ, սպանության համար ավելի մեղմ պատիժ է նախատեսված, քան մարդու առևանգման, թմրաշրջանառության կամ թրաֆիքինգի հանցագործությունների դեպքերում: Նաև դա է պատճառը, որ առաջարկում են խստացնել քրեական օրենսգրքի 104-րդ հոդվածը. 1-ին մասով որպես պատիժ սահմանել ազատազրկում՝ 8-15 տարի ժամկետով (նախկին 6-12-ի փոխարեն), իսկ 2-րդ մասով ազատազրկում՝ 12-20 տարի ժամկետով կամ ցմահ ազատազրկում (նախկին 8-15-ի կամ ցմահ ազատազրկման փոխարեն):
Մարդը եթե իմանա՝ ուրիշի կյանքը խլելու համար 20 տարի ազատազրկվելու է՝ չի անի: Այսպես է մեկնաբանում դատախազության ներկայացուցիչը: Ինչ վերաբերում է պատժի նվազեցմանը, ապա, օրինակ, մի քանի տուփ պահածոյի գողության դեպքում, եթե անչափահասն առաջին անգամ է նման հանցանք կատարել, զղջում է, վնասը վերականգնում, ապա կարելի է մեղադրյալին մեղմ վերաբերվել, չկալանավորել և կիրառել դատախազի ներման տարբերակը:
Առաջարկվում է հրաժարվել հանցագործությունների կրկնակիության ինստիտուտից, որի արդյունքում գործելու է համակցության ինստիտուտը: