«Ա1+»-ի խմբագրությունում, ի պաշտպանություն Նիկոլ Փաշինյանի, մամուլի ասուլիս էին հրավիրել «Ա1+»-ի տնօրեն Մեսրոպ Մովսեսյանը, «Ֆորում» իրավունքի կենտրոնի տնօրեն Տիգրան Տեր-Եսայանը և «Իրավունքի և ազատության » կենտրոնի ղեկավար, իրավապաշտպան Վարդան Հարությունյանը: Հիշեցնենք, որ նոյեմբերի 11-ի գիշերը դիմակավորված անձինք «Կոշ» ՔԿՀ-ում հարձակում էին գործել Նիկոլ Փաշինյանի վրա: «Ես չեմ հավատում, որ Նիկոլը վատ երազ տեսնելուց հետո կարող է գրիչը ձեռքը վերցնել և նկարագրել իր տեսած երազը»,- հայտարարեց Մեսրոպ Մովսեսյանը` հավելելով, որ կրիմինալ աշխարհն ունի իր օրենքները և իրեն թույլ չի տալիս խառնվել քաղաքականությանը: Տիգրան Տեր-Եսայանը նշեց, որ քրեակատարողական հիմնարկներում պետք է տեղի ունենան կառուցվածքային փոփոխություններ: Նա հիշեցրեց, որ ՔԿՀ-ներում իրավունքի խախտման դեպքերի մասին Նիկոլ Փաշինյանը բազմիցս ահազանգել է: Տիգրան Տեր-Եսայանն ասաց, որ եթե ԱԺ-ի վերանորոգման համար գտնվում են գումարներ, ապա ինչո՞ւ չի կարելի գումար գտնել ՔԿՀ-ների վերանորոգման համար: Նա ծիծաղելի է համարում այն հանգամանքը, որ այսօր մարդիկ ստիպված են բարձրացնել Նիկոլ Փաշինյանի անվտանգությունն ապահովելու հարցը: Մեսրոպ Մովսեսյանը նշեց, որ եթե անպատժելիության մթնոլորտը շարունակվի, ապա այն, ինչ այսօր կատարվել է Նիկոլ Փաշինյանի հետ, կկատարվի նաև յուրաքանչյուրիս հետ: