Երեկ տեղացած կարկուտը վնաս է հասցրել բերքատվությանը Հայաստանի որոշ մարզերում։
Կարկուտից հատկապես տուժել են ծիրանենիները Արմավիրում, խնձորենիները՝ Արագածոտնում։
«Ագրարագյուղացիական միավորում» ՀԿ նախագահ Հրաչյա Բերբերյանի կանխատեսմամբ՝ այս տարի կունենանք 20-30% ծիրանի, 60-70 % դեղձի, 50% խնձորի բերքատվություն։ Բերբերյանի կարծիքով, բերքատվության մակարդակի ցածր լինելը պայմանավորված է պարարտանյութեր չկիրառելով և եղանակային պայմաններով։
«Այս տարի լոլիկի, բադրիջանի, վարունգի ցանքատարածություններն ավելացվել են, ինչի արդյունքում այս բանջարեղենները համեմատաբար էժան կլինեն»,- ասում է Հրաչյա Բերբերյանը։
Կարտոֆիլի գները կիջնեն։ «Անցյալ տարվա համեմատ կարտոֆիլի ցանքատարածությունները պակասել են, սակայն բարձր է բերքատվությունը»,-ասում է Բերբերյանը։
Ագրարագյուղացիական միավորում ՀԿ նախագահի կարծիքով, գյուղատնտեսության ոլորտում հարկավոր է բարեփոխումներ անել ոռոգման համակարգում։ «ՋՕԷ-ների օղակը պետք է վերացնել, բազում գյուղացիներ այսօր դատվում են։ Այս միջնորդ կազմակերպության կարիքը չկա»,- ասում է Բերբերյանը։