Այսօր լրագրողների հետ հանդիպման ժամանակ ՀՀԿ խմբակցության քարտուղար Գալուստ Սահակյանը, անդրադառնալով ՀԱԿ-իշխանություն հնարավոր երկխոսությանը, ընդդիմության արդեն հրապարակված պատվիրակության կազմին և իշխանության ծրագրերին այս վերաբերյալ, հայտարարեց.
«Հանրապետական կուսակցության քաղաքական օրակարգում չկա պատվիրակություններ կազմելու խնդիր»։
Գալուստ Սահակյանը հիշեցրեց, որ մի առիթով ինքն արդեն նշել է, որ յուրաքանչյուր քաղաքական ուժ իր բարձրագույն մարմիններն ունի՝ խորհուրդներ, վարչություններ, կուսակցության լիդերներ, նախագահներ, տեղակալներ, և երկխոսելու, բանակցելու համար կուսակցություններն ընտրել են այդ մոդելը. «Նոր տերմինոլոգիա մտցնել՝ 5 հոգի մենք, 5 հոգի դուք, պիտի բանակցենք, խորհրդակցենք… Մենք ասում ենք, որ պատրաստ ենք ցանկացած քաղաքական ուժի հետ խորհրդակցելու, խորհելու, հարցեր քննակելու»,- ասում է Գալուստ Սահակյանը։
Ըստ նրա՝ ՀԱԿ-ն այս կերպ միաբեվեռություն է առաջարկում, և փորձում քաղաքական դաշտում այլ կուսակցությունների նկատմամբ մոնոպոլ կարգավիճակ ստեղծել։
Ընդհանրապես, ՀՀԿ-ական Գալուստ Սահակյանի խոսքն այսօր լի էր հակասություններով, և ամեն անգամ լրագրողների ճշտող հարցադրումներից հետո, Գալուստ Սահակյանը նորովի էր պատասխանում հիմնական, վիճահարույց հարցերին։
Նախ, նա նշեց, որ ցանկացած խնդրի վերաբերյալ, ցանկացած ձևաչափով իշխանությունները պատրաստ են երկխոսել ցանկացած քաղաքական ուժի հետ, հետո, այնուամենայնիվ, նշեց, որ ՀԱԿ-ի առաջարկած ձևաչափը ծիծաղելի է համարում։ Կամ, օրինակ, Գալուստ Սահակյանը նշեց, որ նույնիսկ «շատ ժամանակ չեն ասում, թե ինչ օրակարգով են ցանկանում մեզ հետ խոսել, բանակցել, առաջարկություններ անել», բայց հաջորդ մտքում փաստեց, որ ՀԱԿ-ը երկխոսելու օրակարգում մեկ հիմնական հարց է դնում՝ արտահերթ ընտրությունները, ինչն ինքը ծիծաղելի է համարում.
«Ծիծաղելի բան է այսօր խոսել դրա մասին։ Բազմիցս արտահայտվել ենք, որ դրա համար քաղաքական որևէ գործոն չկա»։
Ավելին, ՀՀԿ խմբակցության ղեկավար Գալուստ Սահակյանը ՀԱԿ-ի գործողությունները բնութագրեց որպես խաղ՝ «տուն-տունիկ».
«Բոլոր երեխաներն էլ մանկապարտեզից, դպրոցական տարիներից տուն-տունիկ են խաղում, նոր են ընտանքի կազմում. Էս մարդիկ հիմա դեռ տուն-տունիկ խաղալու վիճակում են, մենք էդ խաղը չենք ուզում խաղալ, մասնակից դառնալ, բայց խնդիրների թելադրանքով պիտի կարողանանք քննարկումներ կազմակերպել»։