«Այո՛, ես ներողություն եմ խնդրում, որովհետև արդեն 20 տարի է անցել, Սիվիլիթասում ես մոռացել էի՝ ով ում ժամանակ է նստել, բայց ռուսները մի շատ լավ ասացվածք ունեն` Хрен редьки не слаще: Ինձ համար ոչ մի տարբերություն չկա՝ իմ որ ընկերն է նստել Դավիթ Շահնազարյանի ԱԱԾ պետ լինելու օրոք, իսկ որը, այդ թվում ես` Սերժ Սարգսյանի: Ես հստակ պատասխանեցի, թե երկուսին էլ ով էր հրաման տալիս»,- անդրադառնալով Սիվիլիթասի «100 հարց ու պատասխան» նախագծի շրջանակում իր այն հայտարարությանը, թե դաշնակցականները ԱԱԾ-ում բանտարկված են եղել Դավիթ Շահնազարյանի պաշտոնավարման օրոք՝ հայտարարեց ԱԺ ՀՅԴ խմբակցության ղեկավար Վահան Հովհաննիսյանը:
Հովհաննիսյանը նաև պատասխանեց այն հարցին, թե եթե Դաշնակցությունը ռազմաճակատում էր, ապա ո՞վ էր կազմակերպում 1992 թ. հանրահավաքները: Նա նշեց, որ Դաշնակցությունն ամբողջ կազմով ճակատում էր, և Դաշնակցության մասնակցությունը տոկոսային հարաբերակցությամբ եղել է հսկայական. «Ի՞նչ եք ուզում ասել, եթե ամբողջ Դաշնակցությունն այնտեղ է եղել, ո՞վ էր ցույցեր կազմակերպում. ասեմ ձեզ՝ էն ժամանակ շատ ազնիվ մի կուսակցություն՝ ՍԻՄ-ը, Հանրապետականը»:
Այնուհետև Հովհաննիսյանը նկատեց, որ հուսով է՝ բոլորի հումորի զգացումը տեղն է, և ճիշտ ընկալվեց, երբ ինքը ցույցերի կազմակերպիչ անվանեց վերոնշյալ կուսակցություններին։ Ըստ Հովհաննիսյանի՝ եթե Դաշնակցությունը երկրում ցույցեր չկազմակերպեր, ապա իշխանությունները ռազմաճակատում զգոն չէին լինի: