Թեև կառավարության անդամները հայտարարում էին, թե ուշադրությունը ուղղում են դեպի գյուղը, և հույսեր կային, որ սայլը տեղից կշարժվի, սակայն Հայաստանի Ագրարագյուղացիական միավորում ՀԿ նախագահ Հրաչյա Բերբերյանի փոխանցմամբ, գյուղատնտեսական ծրագրերի մեծ մասը ձախողվել է։ Խոսքը վերաբերում է առաջին հերթին կրծողների դեմ պայքարի, պարարտանյութերի, անասնաբուժական ծրագրերին։
«Անասնաբուժական ծրագրեր պետք է իրականացվեին պետության կողմից։ Դաբաղ հիվանդության դեմ դեղանյութերը պետք է բերված լինեին մինչև մայիսի 10-ը, սակայն մինչև այժմ ներկրումը ամբողջությամբ չի կատարվել։ Իսկ ներկրված 350,000 դոզայի մեծ մասը չի կիրառվել»,- տեղեկացնում է Հրաչյա Բերբերյանը և շեշտում, որ օրերս անցկացված քննության արդյունքում պարզվել է, որ դաբաղ և խշխշուկ հիվանդությունները խիստ տարածված են հատկապես Վարդենիսի շրջանում։
Թերացում է արձանագրվել նաև պարարտանյութերի հայտարարված գնի ապահովման հարցում. խոստացված 6500 դրամի փոխարեն, ներկրողները պարարտանյութերը վաճառում են 7100 դրամով։
Իրենց չեն արդարացնում նաև հակակարկտային ծրագրերը։
«Հաջողված է միայն ցորենի ծրագիրը»,- հայտնում է Հրաչյա Բերբերյանը և խորհուրդ տալիս պետական սուբսիսդիաներ հատկացնել՝ խթանելու համար ցորենի արտադրությունը։