Грузия Online-ի փոխանցմամբ՝ Հոլիվուդյան աստղերի մասնակցությամբ Թբիլիսիում կայացած բարեգործական ընթրիքը հավաքել է 1.5 միլիոն լարի (945.000 դոլար)։ Վրաց գործարարներն այդ ընթրիքին մասնակցելու համար ստիպված են եղել գնել 5000-10,000 լարի (3150-6300 ամերիկյան դոլար) արժեցող տոմսեր։
Բարեգործական ընթրիքին նախորդել է 2008 թվականի օգոստոսին տեղի ունեցած ռուս-վրացական պատերազմին նվիրված «Օգոստոսի 5 օրը» ֆիլմի շնորհանդեսը։ Դրան ներկա է գտնվել ֆիլմի նկարահանող խումբը, այդ թվում՝ ֆիլմի ռեժիսոր Ռեննի Հառլինը, դերասան Էնդի Գարսիան և հատուկ հրավիրված հոլիվուդյան աստղ Շերոն Սթոունը։
Վրաստանի նախագահ Միխեիլ Սաակաշվիլին ներկա չի գտնվել ֆիլմի շնորհանդեսին, սակայն մասնակցել է բարեգործական ընթրիքին, ուր և հայտարարել է. «Թեև այս ֆիլմն իրավիճակ չի փոխի, Վրաստանի տարածքները կշարունակեն մնալ օկուպացված, իսկ փախստականները չեն վերադառնա իրենց տները, այնուամենայնիվ, ֆիլմը կարևոր է համայն աշխարհի և առաջին հերթին Վրաստանի համար։ Այս ֆիլմի միջոցով մարդիկ համայն աշխարհում կտեսնեն, թե ինչ են զգացել ու մտածել իրենց անկախության համար պայքարած իմ համաքաղաքացիները»։
Ռեննի Հառլինն ու Էնդի Գարսիան իրենց հերթին հայտարարել են, որ այդ ֆիլմը նկարահանել են հերոսական փոքր քաղաքում, որը ցանկացել է պահպանել իր ազատությունը։ Հառլինը նշել է, որ ԱՄՆ-ում իրենց ֆիլմի շնորհանդեսը տեղի կունենա օգոստոսի 19-ին, որից հետո շատ ամերիկացիների համար Վրաստանը կդառնա առավել հասկանալի ու մոտ երկիր։
Նշվում է, որ բարեգործական ընթրիքից ստացված ողջ հասույթն ուղղվելու է 2008 թվականին ռազմական գործողությունների ժամանակ զոհվածների ընտանիքներին։