Քիչ առաջ ավարտված Ռուսաստան-Հայաստան հանդիպումը, ցավոք, մեր ընտրանու օգտին չէր: Այնինչ, ամեն ինչ կարող էր այլ կերպ դասավորվել:
Նախ, խաղասկզբում հրաշալի պահ կորցրեց մեր թիմի առաջատարներից Յուրա Մովսիսյանը: Նա հաջողությամբ շփոթության մեջ գցեց մրցակցի պաշտպաններին, հարվածեց դարպասին, բայց ի վերջո նրանցից մեկի ոտքը շեղեց մոտ տարածությունից դեպի դարպասն ընթացող գնդակը:
Հանդիպման 25-րդ րոպեն բերկրանք բերեց հայ երկրպագուներին: Նույն Մովսիսյանը ձախ թևից փոխանցում կատարեց միայնության մեջ գտնվող Մարկոս Պիզելլիին, որն էլ չվրիպեց (թեև ռուս պաշտպանը կարող էր փրկել դրությունը):
Չէր անցել մեկ րոպե, երբ ռուսները սառը ցնցուղի հրավիրեցին Վարդան Մինասյանի սաներին: Ռոման Պավլյուչենկոն, հայտնվելով առանց հսկողության, ստացած փոխանցումից հետո մեկ հպումով գնդակն ուղարկեց մեր դարպասը: Հանուն արդարության պետք է նշել, որ այս անգամ էլ Բերեզովսկին կարող էր փրկել մեր թիմին, սակայն գնդակն արդեն հատել էր գիծը:
Երկրորդ կեսում Հայաստանի հավաքականի ֆուտբոլիստները ընդհանուր առմամբ շարունակեցին ցուցադրել հասուն, բարձրակարգ ֆուտբոլ: Եվ սա թերևս այն դեպքն է, երբ Ռուսաստանը հաղթեց առավելապես բարձր կարգի, քան ցուցադրած խաղի շնորհիվ: Նախ Պավլյուչենկոն 59-րդ րոպեին առաջին գոլին չափազանց նման իրավիճակում հաշիվը դարձրեց 2-1, իսկ 73-րդին հեթ-տրիկի հեղինակ դարձավ 11-մետրանոց հարվածից:
Նշենք, որ մեր տղաները բազմաթիվ գեղեցիկ դրվագներ ունեցան, առջևում էլ բավականին վստահ էին զգում: Խաղավարտից րոպեներ առաջ Մխիթարյանին անգամ հաջողվեց տուգանայինի իրացումից հետո գլխով գոլի հեղինակ դառնալ, սակայն մրցավարները չհաշվեցին այն չնչին խաղից դուրս իրավիճակի պատճառով:
Հանդիպումը աչքի ընկավ նաև մեծ թվով զգուշացումներով: Մեր տղաները ստացան հինգ, ռուսները` երկու դեղին քարտ: Ընդ որում, Մովսիսյանի համար դա երկրորդ դեղին քարտն էր այս մրցաշարում, ինչը նշանակում է, որ հաջորդ հանդիպումը նա բաց կթողնի:
Պարտություն 1-3, ինչը ավելի շատ հույսեր, քան հիասթափություն պետք է առաջացնի:
Լուսանկարը` Reuters-ի: