ՀՀ ԱԺ նախագահ Հովիկ Աբրահամյանը վերջերս ձեռք է բերել Նալբանդյան 104 հասցեում գտնվող ՀՀ ոստիկանության մանկապարտեզը` էլիտար շենք կառուցելու նպատակով, որի շինարարական աշխատանքներն արդեն սկսվել են: Մանկապարտեզի աշխատանքային անձնակազմն արդեն տեղափոխվել է Խորենացի 47/1 հասցե: Հիշեցենք, որ ՀՀ կառավարությունը Երևան քաղաքի Նալբանդյան, Ավագ Պետրոսյան փողոցներով և Սայաթ-Նովա պողոտայով պարփակված տարածքի նկատմամբ որոշել է ճանաչել բացառիկ գերակա հանրային շահ, այդ տարածքները ևս Հովիկ Աբրահամյանին տրամադրելու համար: Նշված հասցեների բնակիչներն այսօր մեզ հետ զրույցում ասացին, որ ԾԻԳ-ից արդեն մի քանի օր է՝ իրենցից սեփականաշնորհման գրքույկներն են պահանջում, իսկ ավտոտնակների վրա նախազգուշացումներ են փակցրել, որ սեփականատերերը ներկայանան ԾԻԳ: Բնակիչները նշեցին, որ Հովիկ Աբրահամյանի «նազիր-վեզիրները» դեռ գումարային փոխհատուցման մասին խոսք չեն բացում, հետևաբար, իրենք որոշել են խորհուրդ ստեղծել: Խորհուրդը կպարզի այսօրվա շուկայական գները, և Հովիկ Աբրահամյանի «նազիր-վեզիրներին» իրենք կառաջարկեն, թե ինչ գումարային փոխհատուցման դեպքում պատրաստ կլինեն դուրս գալ իրենց բնակարաններից: