ԱԻՄ նախագահ Պարույր Հայրիկյանը այսօր լրագրողների հետ հադիպման ժամանակ նշեց, որ իշխանության և ընդդիմության միջև երկխոսությունն անիմաստ երևույթ է, որն անտեղի ճոռոմացնում են: Նա նշեց, որ դա ժողովրդի ուշադրությունը կարևոր խնդիրներից անիմաստ գործընթացների վրա սևեռելու փորձ է:
Ըստ Հայրիկյանի՝ այդ երկխոսությունն անիմաստ է, քանի որ կողմերը հստակ չեն նշում, թե ինչ են ուզում. ընդդիմությունը խոսում է իշխանափոխության մասին, ինչը, սակայն, չի ենթադրում համակարգային փոփոխություններ: Հայրիկյանը նկատեց, որ եթե ՀԱԿ-ը այժմ պայքարեր ավելի վեհ գաղափարների, ժողովրդավարական համակարգերի հաստատման համար, ապա ինքը թեկուզ չսիրելով այդ ուժին՝ կմիանար այդ պայքարին:
Հայրիկյանի գնահատմամբ՝ խոսել արտահերթ ընտրությունների մասին անտրամաբանական է, քանզի մարդու իրավունքները խախտող Ընտրական օրենսգրքի նույն բարոյահոգեբանական մթնոլորտի առկայության պայմաններում արդար ընտրություններ անցկացնել հնարավոր չէ. «Եթե խոսում են արդար ընտրությունների մասին, նշանակում է, որ ի սկզբանե նրանք զբաղվում են ինքնախաբեությամբ: Հարցին, թե հնարավո՞ր է ՀԱԿ-իշխանություն բանակցությունները նոր միասնություն դաշինք ստեղծեն՝ Հայրիկյանը պատասխանեց. «Միասնություն դաշինքն արդեն շրջանառության մեջ է»:
