«Ժողովրդավար հասարակարգերով ղեկավարվող երկրներում իշխանություն-
ընդդիմություն երկխոսությունը օրինաչափ երևույթ է»,- «Առաջին լրատվական»-ի հետ զրույցում կարծիք հայտնեց Լիբանանում լույս տեսնող Դաշնակցության պաշտոնաթերթ՝ «Ազդակի» գլխավոր խմբագիր Շահան Գանդահարյանը։
Վերջինս դրական է գնահատում, ընդհանրապես, Հայաստանի քաղաքական դաշտի բաղկացուցիչ բոլոր քաղաքական ուժերի միջև մնայուն երկխոսությունը, որը, համենայնդեպս, միշտ չէ, որ, ըստ նրա, հանգեցնում է համագործակցության։ «Ներկա ձևաչափը, սակայն, իր շարժառիթներով և բովանդակային առումով հարցականների տեղիք է տալիս», – ասում է Շահան Գանդահարյանը։
Մեր զրուցակցի կասկածների և մտահոգությունների պատճառը, ինչպես ինքը նշեց, ՀԱԿ առաջնորդ, ՀՀ առաջին նախագահ Լևոն Տեր-Պետրոսյանի ելույթն է վերջին հանրահավաքի ժամանակ, որտեղ նա մի կողմից նշում է, որ «այսուհետ ևս Հայաստանի իշխանական բուրգը համարվելու է ոչ լեգիտիմ, ավազակապետական, քրեաօլիգարխիկ, թաթար-մոնղոլական համակարգ», իսկ մյուս կողմից հավելում, թե «Հայաստանում ստեղծված է նոր քաղաքական իրավիճակ, որը հնարավորություն է տալիս թեկուզ ամենասուր խնդիրները լուծել օրինական ճանապարհով։ Մենք պատեհություն ունենք աշխարհին ապացուցելու, որ հիրավի պետականության դարավոր ավանդույթներ ունեցող քաղաքակիրթ ժողովուրդ ենք»։