Ռուսական Regnum գործակալության փոխանցմամբ՝ Վրաստանի արտգործնախարությունը հատուկ հայտարարություն է տարածել, որում Ռուսաստանի վարչապետ Վլադիմիր Պուտինին մեղադրել է Վրաստանի պետական սահմանի խախտման մեջ։ Խոսքը գնում է այն մասին, որ Պուտինն աբխազական առաջնորդ Սերգեյ Բաղափշի թաղման արարողակարգի կապակցությամբ ացելել էր Սուխում։
Վրաստանի ԱԳՆ-ի տարածած հայտարարության մեջ մասնավորապես նշված է. «Հունիսի 2-ին Ռուսաստանի Դաշնության վարչապետ Վլադիմիր Պուտինը, խախտելով Վրաստանի պետական սահմանը, ժամանել է օկուպացված Սուխում՝ Բաղափշի թաղման արարողակարգին»։
Վրաստանի ԱԳՆ-ը մեկնաբանել է նաև պուտինյան այն հայտարարությունը, թե Ռուսաստանի կառավարությունն աջակցելու է Աբխազիային՝ իր բոլոր հարևանների հետ միջազգային շփումներ հաստատելու հարցում.
«Աբխազիան այսպես կոչված նոր իրողության մեջ ունի երկու մերձակա հարևան՝ Ռուսաստանն ու Վրաստանը։
Կրեմլը համառորեն փորձում է ստեղծել իր իսկ կողմից հիմնված օկուպացիոն ռեժիմի պատրանքը և միջազգային փոխհարաբերություններն օգտագործել որպես գործիք՝ էթնիկ մաքրման, ինքնիշխան պետության տարածքի օկուպացման և գոյություն ունեցող սահմանների բռնի փոփոխման փորձերի համար։
Վրացական կողմը Պուտինին բացատրում է, որ այդ բոլոր փորձերը մատնված են անհաջողության, քանի որ ո՛չ Վրաստանը, ո՛չ էլ միջազգային հանրությունը չեն ընդունում էթնիկ մաքրման և միջազգային իրավունքի նորմերի խախտման արդյունքում ստեղծված այդ նոր իրողությունը (Աբխազիա)»։
Հիշեցնենք, որ հենց հունիսի 2-ին Euronews ին տված հարցազրույցում Վրաստանի նախագահ Միխեիլ Սաակաշվիլին հայտարարել էր. «Մենք ինքնասպաններ չենք և չենք ցանկանում հակամարտության մեջ մտնել Ռուսաստանի հետ։ Մենք արդեն ականատես ենք եղել, թե դա ինչպիսի բացասական հետևանքներ է ունեցել։
Բայց մյուս կողմից էլ մենք ցանկանում ենք պահպանել մեր ազատությունն ու անկախությունը, մենք չենք ցանկանում վերադառնալ ռուսական կայսրության գերիշխանությանը։ Իհարկե, դա ֆանտաստիկայի ժանրից է, սակայն այն դեռ նստած է որոշ քաղաքական գործիչների ուղեղներում, որոնց գլխավորում է Ռուսաստանի վարչապետ Վլադիմիր Պուտինը։ Իսկ դա մեծ խնդիր է ստեղծում»։