Արտակարգ և լիազոր դեսպան Արման Նավասարդյանը երեկ «Հժ»-ին տված հարցազրույցում ասել է, որ ընդդիմության և իշխանության միջև երկխոսությունը պարզապես բարեբախտություն Է. «Այն, ինչ կար առ այսօր՝ մենք գտնվում էինք ճգնաժամային վիճակում, և այն, ինչ հիմա կատարվում է, դա պարզապես պետք է համարել մեծ բարեբախտություն մեր քաղաքական ռեալիայի համար»։
Իր խոսքում Ա. Նավասարդյանը երկխոսությունը համարել է իշխանության և ընդդիմության լավագույն քայլը. «Պետք է ամեն ինչ անել, որ այդ երկխոսությունը շարունակվի, որովհետև ես միանշանակ կարող եմ ասել, որ սա բխում է պետականության շահերից, և ով դեմ է նման գործընթացի, նա պարզապես առաջնորդվում է նեղ կուսակցական հետաքրքրություններով»։
Հարցին, թե Հայաստանում ինչպես կարող է ավարտվել երկխոսությունը, դեսպանը պատասխանել է. «Պետք է լավատեսորեն մոտենալ այս հարցին և ամեն կերպ փայփայել այս գործընթացը 2 կողմից։ Սա համազգային խնդիր է, որից կախված է մեր երկրի թե՛ ներքին, թե՛ արտաքին քաղաքականության ողջ ընթացքը»։
