Աշոտ Բլեյանը, անդրադառնալով Ռոբերտ Քոչարյանի գրասենյակի ղեկավար Վիկտոր Սողոմոնյանի այն հայտարարությանը, որ Քոչարյանի օրոք որևէ քաղբանտարկյալ Հայաստանում չի եղել, ասում է. «Ես չեմ կարող ինձ քաղաքական բանտարկյալ չհամարել։ Ես դատապարտվել եմ ակնհայտ ապօրինաբար, և իմ՝ քաղբանտարկյալ լինելու փաստը ճանաչվել է նաև միջազգային կառույցների կողմից»։
Բացի դա, Բլեյանի ձևակերպմամբ՝ մարդիկ դարձել են «քաղաքացի բանտարկյալներ» Քոչարյանի օրոք, քանի որ ոտնահարվել են մարդու հիմնարար իրավունքները՝ աշխատանքի, կյանքի, սեփականության անձեռնմխելիության և այլ իրավունքները։ «Երբ մարդ հարկադրված լքում է Հայաստանը, երբ մարդ ստանում է 30,000 դրամ թոշակ կամ 100,000 դրամ աշխատավարձ, խախտվում է նրա արժանապատիվ ապրելու իրավունքը»,- ասում է Աշոտ Բլեյանը։
Այդ բոլոր իրավունքները Քոչարյանը պարտավոր էր պաշտպանել, քանի որ դա յուրաքանչյուր նախագահի սահմանադրական պարտականությունն էր։