Բեյրութում լույս տեսնող հայկական «Արարատ»՝ ՍԴՀԿ պաշտոնաթերթի գլխավոր խմբագիր Ահարոն Շխրտմյանը կարծում է, որ ցանկացած երկրի քաղաքական դաշտում էլ ընդդիմության և իշխանության միջև կարող են և պետք է լինեն տարակարծություններ, որոնք, սակայն, հաճախ կարող են մեղմանալ.
«Հայաստանում բավականին լարված էր մթնոլորտը ընդդիմության և իշխանության միջև: Շատ ողջունելի է, որ 2 կողմերն էլ համոզվեցին, որ այս հարցերը կարող են լուծվել երկխոսության սեղանի վրա»:
Ըստ նրա՝ երկու կողմերի համար էլ շահավետ կլինի հենց երկխոսության ճանապարհով լուծել ստեղծված խնդիրները, քանի որ հակառակ դեպքում «կարող են ժխտական զարգացումներ տեղի ունենալ»:
Անդրադառնալով հնարավոր երկխոսության արդյունավետությանը, կողմերի միջև վստահության ձևավորման հնարավորությանը՝ Ահարոն Շխրտմյանը նշեց.
«Բնականաբար, երբ իշխանությունը կամ ընդդիմությունը երկխոսության սեղանի շուրջ նստեն, սկզբում փոխադարձ անվստահություն կարող է լինել: Բայց երբ սկսվի երկխոսությունը, քննարկվեն օրակարգերը, երկու կողմերի վստահությունն էլ կսկսի ավելի ամրանալ»:
Մեր զրուցակցի կարծիքով, եթե որևէ մի անհատ կամ քաղաքական ուժ նպատակ ունի իսկապես ծառայել Հայաստանին, տնտեսական վերափոխումներ իրականացնել, մարդու իրավունքները բարելավել, երկխոսությունն ամենակարևոր և հարմար ճանապարհն է դրա համար:
