Shamshyan.com-ի փոխանցմամբ՝ այսօր՝ հոկտեմբերի 7-ին, ավտովթար է տեղի ունեցել Գեղարքունիքի մարզում: Ժամը 07:30-ի սահմաններում Աբովյան քաղաքի բնակիչ 40-ամյա Սամվել Խաչատրյանը, իր կողմից վարած BMW մակնիշի 33 ԼP 369 համարանիշի ավտոմեքենայով Երևան-Իջևան ավտոճանապարհի 70-րդ կմ հատվածում՝ Դիլիջանի թունելից դեպի Երևան ընթանալիս, դուրս է եկել ճանապարհի երթևեկելի գոտուց և, մոտ 10 մետր գլորվելով, հայտնվել գետի մեջ:
Ինչպես հայտնում է shamshyan.com-ը, վթարի հետևանքով վարորդ Ս. Խաչատրյանը և ավտոմեքենայի ուղևորներ՝ 25-ամյա Լյուդվիկ Ավետիսյանը, 18-ամյա Գաբրիել Մկրտչյանը և 18-ամյա Վաչիկ Գզիրյանցը, մարմնական վնասվածքներով տեղափոխվել են Սևանի բժշկական կենտրոն:
Ավտոմեքենան գետի մեջ կողաշրջված էր, իսկ բոլոր վիրավորներին ավտոմեքենայից դուրս են բերել ոստիկանության Սևանի բաժնի օպերատիվ խումբը և ՀՀ Արտակարգ իրավիճակների նախարարության փրկարար ծառայության Սևանի թիվ 33 հրշեջ-փրկարարական ջոկատի փրկարարները, ովքեր ժամանել էին 1 մարտական հաշվարկով: Սևանի ոստիկանների աշխատանքը տեղում ղեկավարում էր Սևանի ոստիկանապետ Վիգեն Աղեկյանը: Ըստ ֆոտոլրագրողի տեղեկությունների՝ Ս. Խաչատրյանը ծառայում է ՀՀ ՊՆ N զորամասում՝ որպես շտաբի պետ, կոչումով փոխգնդապետ է, Լ. Ավետիսյանը նույն զորամասի սպա է՝ կոչումով ավագ լեյտենանտ, իսկ Գ. Մկրտչյանն ու Վ. Գզիրյանցը նույն զորամասի ժամկետային զինծառայողներ են:
Մանրամասները՝ shamshyan.com-ում