Առնվազն 15 մարդ է զոհվել Եգիպտոսում պաշտոնից հեռացված նախագահ Մուհամմեդ Մուրսիի կողմնակիցների և ոստիկանության միջև բախումների հետևանքով: Այս մասին ասվում է երկրի առողջապահության նախարարության ներկայացուցչի հայտարարության մեջ:
Ավելի վաղ տեղեկացվում էր մեկ զոհվածի մասին: «Մուսուլման եղբայրներ» շարժման կողմնակիցները կիրակի օրը Կահիրեից 300 կմ հարավ գտնվող Դելգա քաղաքում ցույց են անցկացրել: Երբ ցուցարարները մոտեցել են ոստիկանական բաժնին, բախումներ են սկսվել: Ցուցարարները ոստիկանների վրա քարեր են նետել, այնուհետև իրավապահներն օդ են կրակել: Ընդ որում, անվտանգության ուժերը կտրականապես հերքել են մարդկանց զոհվելու և վիրավորվելու հարցում իրենց մեղքը:
Մինչդեռ Կահիրեում ոստիկանությունը «Մուսուլման եղբայրների» կողմնակիցներին ցրելու նպատակով արցունքաբեր գազ է կիրառել: Իսլամիստները տարբեր կողմերից շարժվել են դեպի մայրաքաղաքի կենտրոն, սակայն նրանց կանգնեցրել են անվտանգության աշխատակիցները:
Բախումներ են տեղի ունեցել նաև Գարդեն-Սիթիի մոտակայքում, որտեղ տեղակայված են ամերիկյան և բրիտանական դեսպանատները: Հրաձգություններ են լսվել Four seasons հյուրանոցի և իտալական դիվանագիտական առաքելության մոտակայքում:
Դրանից բացի, Ալեքսանդրիայում անկարգություններ հրահրելու մեղադրանքով 20 մարդ է ձերբակալվել: Ասուանում ոստիկանությունը ստիպված է եղել ցուցարարներին ցրելու համար արցունքաբեր գազ կիրառել:
