Թե՛ համացանցն է իր գնահատականներում բացարձակապես ճիշտ, երբ կտրուկ դատապարտում է ոստիկանների կողմից պատանդ վերցրած տղամարդուն դիպուկահար կրակոցով սպանելու փաստը, թե՛ ոստիկաններն են ճիշտ, որոնք գնահատական են տալիս զուտ ոստիկանական դիրքերից։ Այդ մասին «Առաջին լրատվական»-ի հետ զրույցում նշել է «Հոգևոր Հայաստան» նախաձեռնության աջակից, ՀՀ ներքին գործերի նախկին նախարար Աշոտ Մանուչարյանը։
«Մյուս կողմից, ստեղծված իրավիճակը՝ կապված այս դեպքի հետ, ցույց է տալիս, թե մենք ինչ վիճակի ենք հասել, որքանով է կազմաքանդված մեր պետական համակարգը, որքանով ենք մենք հեռու այն խնդիրներից, որոնք մեր առջև կարող են ծագել»,- ասաց նա։
Մանուչարյանի խոսքերով՝ այս հարցը ոստիկանության հարցը չէ. «Երբ այսպիսի դեպք է լինում աշխարհի ցանկացած վայրում, առաջին կասկածն այն է, թե արդյո՞ք մենք գործ ունենք վերպետական համակարգերի հետ, որոնք գործել են Եվրոպայում, հարևան Իրանում, հարևան Ադրբեջանում, Վրաստանում։ Իսկ Հայաստանը սրբավա՞յր է, այստեղ նման բան տեղի ունենալ չի՞ կարող։ Իրականում այստեղ եղել է Պերմյակովի դեպքը, եղել է ավտոբուսի պայթյունը Աջափնյակում, եղել է ռուս զինվորի սպանության դեպքը։ Ես թվարկում եմ միայն այն դեպքերը, որոնք տեղ են գտել լրատվամիջոցներում, տասնյակ դեպքեր նման ուշադրության չեն արժանացել, բայց Հայաստանը դուրս չէ այդ ամենից։ Գոնե Պերմյակովի և ռուս զինծառայողի սպանության դեպքում մենք ծիսական սպանության հետ գործ ունենք, որտեղ երկրորդ դեպքում հայտարարվել է՝ «ես իսլամ եմ ընդունել»։
Մանուչարյանը կարծիք հայտնեց, որ սա այսօրվա աշխարհի զարգացումների դրսևորումներն են, և մենք գտնվում ենք այդ դրսևորումների կիզակետերից մեկում. «Մենք հենց այնտեղ ենք, որտեղ ձևավորվում են այդ բոլոր հարձակողական համակարգերի մի զգալի մասը։ Եվ անընդունելի է ասել, որ այդ ամենը մեզ կշրջանցի»։
Հարցազրույցն ամբողջությամբ՝ տեսանյութում:
