Apple-ի հաջորդ սմարթֆոնի շնորհանդեսը տեղի կունենա երեքշաբթի՝ սեպտեմբերի 12-ին: Ֆրանսիական Mac4Ever կայքը, հղում անելով իր աղբյուրին, տեղեկացնում է, որ Apple-ի նոր արտադրանքը կցուցադրվի Կալիֆոռնիայում տեղական ժամանակով ժամը 9-ին:
Ակնկալվող ամսաթիվը չի կարելի անվանել անակնկալ․ 2012 թվականից սկսած՝ բոլոր նոր iPhone-ները ցուցադրվել են սեպտեմբերին: Օրինակ՝ iPhone 7 և iPhone 7 Plus սմարթֆոնները ներկայացվել են անցած տարվա սեպտեմբերի 7-ին, իսկ iPhone 6S-ն ու 6S Plus-ը՝ 2015-ի սեպտեմբերի 9-ին։ Սպասվում է, որ Apple-ը մոտ օրերս աշնանային մամուլի ասուլիսի համար կսկսի հրավերներ ուղարկել։
Որպես կանոն՝ Apple-ը շնորհանդեսից հետո ուրբաթ օրը նորույթի համար ընդունում է նախնական պատվերներ, իսկ մեկ շաբաթ հետո սկսում է վաճառել։ Այսպիսով, եթե Mac4Ever-ի տվյալները ճիշտ են, ապա կարող եք պատվիրել սարքերը սեպտեմբերի 15-ին, իսկ գնել՝ սեպտեմբերի 22-ին:
Ակնկալվում է, որ iPhone 8-ը կստանա 5․8 դյույմանոց OLED-էկրան և կլինի ընկերության ամենամեծ սմարթֆոնը։ Հիշեցնենք, որ iPhone 7 Plus-ն ունի 5․5 դյույմանոց էկրան։ Փորձագետների կարծիքով՝ էկրանը զբաղեցնելու է նոր սմարթֆոնի ամբողջ դիմային հատվածը՝ առանց կողերից բաժանարար գծերի։ Հայտնի է նաև, որ iPhone 8-ը կունենա կրկնակի տեսախցիկ և անլար լիցքավորման հնարավորություն, դեմքի ճանաչման սենսորը համակցված կլինի աչքի սկան տեխնոլոգիայի հետ:
