Հայաստանի դեղագործության մրցունակության միջազգային երրորդ համաժողովի բացմանը ՀՀ Էկոնոմիկայի նախարար Ներսես Երիցյանը ասաց, որ այսօր հայկական դեղագործական շուկայում ունենք փոքր, բայց տպավորիչ արդյունքներ։ «Հայկական դեղերը տեղական սպառման շուկայում կազմում են մոտ 12%, որը այս ոլորտի համար բավականին մեծ ցուցանիշ է եւ ավելանալու միտում ունի։ Իսկ ամբողջ արտադրանքի մոտ 40%-ը անտահանվում է հետխորհրդային եւ միջինասիական երկրներ»։
Երիցյանը տեղեկացրեց, որ եթե 2005թ-ին ունեցել ենք 1.5մլն դոլարի արտահանման ծավալ, ապա 2009-ին, չնայած ճգնաժամային պայմաններին, այդ թիվը եռապատկվել է եւ այս տարվա տասը ամիսների կտրվածքով աճը կազմել է մոտ 19 տոկս։ Էկոնոմիկայի նախարարը արձանագրեց, որ Հայաստանում դեղագործական ոլորտը կենսունակ է, եւ մենք կարող ենք դառնալ այդ ոլորտի առաջատարներից, իսկ ոլորտի մրցունակությունը բարձրացնելու համար անհրաժեշտ է առավել համախմբվել, գնահատել մարտահրավերները եւ զարգացմանը խոչընդոտող հարցերին արագ լուծումներ առաջարկել։