ՌԴ Պետդումայի ԱՊՀ հարցերով հանձնաժողովի առաջին փոխնախագահ Կոնստանտին Զատուլինին պաշտոնից հեռացման հարցը չի քննարկվել իշխող «Եդինայա Ռոսիա» կուսակցության խորհրդի նիստում,
Ինչպես հաղորդում է РИА Новости գործակալությունը, այս մասին հայտարարել է Պետդումայի խոսնակ Բորիս Գրիզլովը:
Հիշեցնենք, որ երեկ «Վեդոմոստի» թերթը, հղում անելով անանուն աղբյուրների, տեղեկատվություն էր տարածել, թե իշխող կուսակցության խորհրդի նիստում քննարկվելու է Զատուլինին պաշտոնից ազատելու հարցը ՌԴ բարեկամ երկրների իշխանությունների հետ ունեցած տարաձայնությունների պատճառով: Մասնավորապես, հաղորդվում էր, թե Զատուլինը քննադատությամբ էր հանդես գալիս Ուկրաինայի իշխող «Ռեգիոնների կուսակցության» հասցեին, ԼՂՀ այցելության պատճառով persona non grata էր ճանաչվել Ադրբեջանում և այլն: Որպես հեռացման պատճառ՝ նշվում էր նաև վերջինիս Մոսկվայի նախկին քաղաքապետ Յուրի Լուժկովի հետ ունեցած սերտ կապերը:
«Չեմ հասկանում, թե ինչպես է նմանատիպ տեղեկատվությունը հայտնվում լրատվամիջոցներում», – լրագրողներին հայտարարել է Պետդումայի խոսնակը՝ ժխտելով կուսակցության նիստում հարցի քննարկման մասին լուրերը: Ավելի վաղ, հենց ինքը՝ Զատուլինը, գործակալությանը հայտնել էր, թե տեղյակ չէ նմանատիպ նախաձեռնություններից:
