Միջազգային հանրությունը հաճախ խոսում է այն մասին, որ ներքաղաքական անկայուն վիճակն է Հայաստանին և Ադրբեջանին ետ պահում ԼՂ հարցում առավել որոշիչ քայլեր իրականացնելուց:
Ռուս քաղաքական վերլուծաբան Ալեքսեյ Վլասովի խոսքերով, այն, որ Իլհամ Ալիևը կարողացել է առժամանակ գլուխ հանել ներքաղաքական խնդիրներից, իսկ Հայաստանում էլ սկսվել է քաղաքական երկխոսություն, դեռ չի նշանակում, թե ամեն ինչ կայուն է և կարելի է գնալ որոշիչ քայլերի: Վերլուծաբանի գնահատմամբ, Հարավային Կովկասում իրավիճակը բավական դինամիկ է փոխվում, ինչպես նաև մեծ է արտաքին գործոնի ազդեցությունը:
«Այստեղ պետք է հաշվի առնել, թե ի՞նչ հնարավորություն կա Հարավային Կովկասի ներքաղաքական այդ կայունությունը հաստատուն դարձնելու, և արդյո՞ք Արևմտյան խաղացողները ցանկություն չեն ունենա արհեստականորեն լարվածության կետեր ստեղծել կասպիական շրջանում կամ էլ Հայաստանում, որպեսզի պահպանվի ռուսական ազդեցությունը»,- «Առաջին լրատվականի» հետ զրույցում մանրամասնեց Վլասովը:
Նրա խոսքերով, հաշվի առնելով արտաքին մեծ ազդեցությունը հարավկովկասյան երկրների ներքաղաքական գործընթացների վրա՝ այժմ շատ դժվար է կանխատեսել, որ ԼՂ հարցում հնարավոր կլինի առաջընթաց գրանցել. «Դա շատ լավատեսական կլիներ, սակայն կարծում եմ, որ շատ բան կիմանանք այս տարվա աշնանը, որը բավական որոշիչ կլինի»: