Բասկետբոլի Հայաստանի ազգային հավաքականն այսօր աշխարհի առաջնության նախընտրական փուլի վերջին հանդիպումը կանցկացնի՝ «Միկա» մարզահամալիրում ժամը 20-ին մրցելով Բոսնիա և Հերցեգովինայի ընտրանու հետ: Խաղի նշանակության մասին բազմիցս ենք խոսել: Հաղթանակը մեր հավաքականին դուրս կբերի եվրոպական բասկետբոլային էլիտա, որտեղ կպայքարենք աշխարհի առաջնության եզրափակիչ փուլում խաղալու համար:
Հայաստանի ազգային հավաքականն արդեն իսկ լուծել է կարևորագույն մի խնդիր: «Հայաստանի հավաքականը ցույց տվեց, որ կարող է լինել արժանի մրցակից եվրոպական ցանկացած հավաքականի համար: Հայաստանն այսօր եվրոպական բասկետբոլային քարտեզի վրա ունի իր տեղը: Կարճ ժամանակահատվածում մենք ճանաչում ձեռք բերեցինք»,- «Առաջին լրատվական»-ին տված հարցազրույցում ասել էր Հայաստանի ազգային հավաքականի առաջատար Ռայան Բոաթրայթը:
Մեր բասկետբոլիստներն անում են գուցե անհնարը՝ հաղթելով Եվրոպայում ճանաչում ունեցող հավաքականներին: Բոլորն ուրախ են, բոլորը հպարտանում են Հայաստանի ազգային հավաքականով, սակայն մերոնց երևանյան հանդիպումներում նախկին «Միկա» մարզահամալիրը ամենևեին էլ լեցուն չի լինում:
«Տղերք ջան, ձերը ցավը տանեմ, մենք հպարտանում ենք ձեզանով» արտահայտությունը սոցիալական ցանցերում հրապարակում են հազարավոր օգտատերեր: «Ափսոսում եմ, որ քիչ մարդ կար տրիբունաներում, քանի որ կարծում եմ՝ այսօրվա մեր խաղը հիանալի էր: Լսել եմ, որ հայ երկրպագուները շատ ակտիվ են, և մենք դրա կարիքը շատ ունենք։ Չեմ ասում, որ այսօր երկրպագուները ակտիվ չէին, բայց ավելի օգտակար կլինի թիմի համար, եթե մենք խաղանք երկրպագուներով լի դահլիճում»,- Սլովակիայի հետ հանդիպումից հետո նշել էր Հայաստանի հավաքականի գլխավոր մարզիչ Նիկշա Բավցևիչը։
Պատկերն իսկապես աբսուրդային է: Հայրենասիրական, ոգեշնչող և հուզիչ արտահայտություն գրելով՝ մեր հայրենակիցները ամենևին չեն օգնում Հայաստանի հավաքականի խաղացողներին, ովքեր այսօր աջակցության լուրջ կարիք ունեն: Հազարավոր երկրպագուներ այսօր բողոքում են, որ տոմսերի թանկ լինելու պատճառով զրկված են ֆուտբոլի Հայաստանի ազգային հավաքականի հանդիպումները «Հանրապետական» մարզադաշտում դիտելու հնարավորությունից: Բասկետբոլի Հայաստանի ազգային հավաքականի այսօրվա հանդիպումն իր նշանակությամբ և կարևորությամբ ամենևին չի զիջում, ասենք, սեպտեմբերի 3-ին կայանալիք Հայաստան-Դանիա հանդիպմանը, որի ելքը շատերի համար, կարծում ենք, պարզ է: Նշենք, որ այսօրվա հանդիպման մուտքը ևս ազատ է լինելու ինչպես նախորդ մրացավեճերի ժամանակ:
«Մեզ կօգնի սեփական հարկի տակ խաղալը՝ մեր երկրպագուների աջակցությունը: Հույս ունեմ, որ մարզադահլիճը լեփ-լեցուն կլինի, որովհետև այս խաղը մեծ հետաքրքրություն է առաջացրել Հայաստանում»,- երեկ հայտարարել էր Բավցևիչը՝ կոչ անելով երկրպագուներին գալ մարզահամալիր և լինել ազգային հավաքականի կողքին:
Երկրպագուներին մարզահամալիր գալու կոչով դիմել էր նաև երկրպագուների «Առաջին ճակատ» շարժումը՝ ՖԱՖ-ը, որը պատրաստվում է բուռն կերպով աջակցել բասկետբոլի Հայաստանի ազգային հավաքականին: «Միացեք մեզ երկրպագման ողջ ընթացքում՝ միասին աջակցենք մեր տղաներին, դժոխք կազմակերպենք Բոսնիայի ազգային հավաքականի համար»,- կոչ էր արել ՖԱՖ-ը:
Հուսանք, որ այսօր նախկին «Միկա» մարզահամալիրում խաղալը բոսնիացիների համար կվերածվի դժոխքի, իսկ հայ երկրպագուների համար բասկետբոլային տոն կլինի: Հայաստանի հավաքականն արժանի է հաղթահարելու ընտրական այս փուլը և հասնելու պատմական հաջողության:
Հիշեցնենք, որ այս թիմերի միջև Սարաևոյում կայացած հանդիպումն ավարտվել էր 98:85 հաշվով՝ հօգուտ Բոսնիայի: Ընտրական А ենթախմբում Հայաստանի, Բոսնիա և Հերցեգովինայի և Շվեդիայի հավաքականներն ունեն 8-ական միավոր: Շվեդիան արդեն իսկ ապահովել է մասնակցությունն աշխարհի առաջնության հիմնական ընտրական փուլում: Մյուս ուղեգիրը կվիճարկվի ժամը 20-ին, «Միկա» մարզահամալիրում: