Մոսկվայում չեն կարողանում մարսել այն փաստը, որ Հայաստանը մասնակցել է Վրաստանում անցկացված ՆԱՏՕ-ի զորավարժություններին: Եթե անգամ այդ մասնակցությունը Երևանը կանխավ համաձայնեցնել էր Մոսկվայի հետ, իրավիճակը կտրուկ փոխվեց Ռուսաստանի դեմ ամերիկյան նոր պատժամիջոցների և Վրաստան ԱՄՆ փոխնախագահ Մայք Փենսի այցելության ֆոնին: Ռուսական մի քանի կայքեր բացահայտորեն կասկածի տակ են դնում Հայաստանի իշխանությունների հավատարմությունը:
«Առաջին լրատվական»-ին տված հարցազրույցում բավականին կոշտ է արտահայտվել «Ռեգնում» լրատվական-վերլուծական կայքի գլխավոր խմբագիր Մոդեստ Կոլերովը, որը հայտնի է Կրեմլի հետ ունեցած իր կապերով: «Հայաստանն ինքն է ասել, որ համերաշխություն ունի ՆԱՏՕ-ի նկատմամբ։ Այդ համերաշխությունը տեղի է ունենում Թուրքիայի և Ադրբեջանի հետ համատեղ մասնակցությամբ։ Ահա և վերջ։ Եվ եթե Հայաստանը մասնակցում է այդ նախագծերին Թուրքիայի ու Ադրբեջանի հետ համատեղ, նշանակում է՝ իրեն Ռուսաստանի հետ Միացյալ զորախումբ անհրաժեշտ չէ։ Վերջ: Ուրեմն թող Հայաստանը կանչի ՆԱՏՕ-ին, որ բարիշացնի իրեն Թուրքիայի ու Ադրբեջանի հետ», – ասել է Կորելովը:
Ռուսաստանցի պաշտոնյաներին և փորձագետներին բնորոշ է ցանկացած գնով իրենց ուղերձը կամ նույնիսկ սպառնալիքը համապատասխան լսարանին հասցնելու մարտավարությունը` չխորշելով անգամ բացահայտ կեղծիքներից: Օրինակ` Կոլերովն ակնհայտ թյուրիմացության մեջ է գցում ընթերցողներին` տպավորություն ստեղծելով, թե իբր Ադրբեջանը մասնակցել է Վրաստանի զորավարժություններին: Կամ քաղաքագետը միանգամայն կեղծ պատկեր է ստեղծում, թե իբր Մոսկվան զբաղված է հայ-ադրբեջանական կամ հայ-թուրքական հաշտեցման գործընթացներով և սա այն դեպքում, որ Մոսկվան սպառազինում է Ղարաբաղյան հակամարտության կողմերին, իսկ Հայաստանում տեղակայված ռուսական ռազմաբազան հայ-թուրքական հնարավոր մերձեցման պատնեշներից մեկն է: Սակայն այս բոլոր մանիպուլյացիաները մանրուք են այն բացահայտ սպառնալիքի համեմատ, որը հնչեցնում է Կոլերովը: «Ուրեմն թող Հայաստանը կանչի ՆԱՏՕ-ին, որ բարիշացնի իրեն Թուրքիայի ու Ադրբեջանի հետ»,- ասել է Կոլերովը` դիվանագիտորեն հասկացնելով, որ Հայաստանը շատ թանկ, գուցե պատերազմով է հատուցելու ՆԱՏՕ-ի զորավարժություններին մասնակցելու համար:
Մոսկվայում գտել են Ադրբեջանին նոր պատերազմի քարտ բլանշ տալու «լեգիտիմ» հիմքը` դա Հայաստանի իշխանության արտաքին քաղաքականության իբրև թե վերանայումն է: Այսինքն՝ Մոսկվայում հասկացնում են, որ եթե Հայաստանը շարունակի ՆԱՏՕ-ի հետ համագործակցությունը կամ նույնիսկ նոր համաձայնագիր ստորագրի ԵՄ-ի հետ, ապա իրենք Ադրբեջանին կսադրեն պատերազմի Հայաստանի դեմ` մեղքը բարդելով մեր «արևմտամետ» իշխանությունների վրա:
