Երեկ Գրողների միության Լոռու մարզային բաժանմունք այցելած գրող, գրողների միության քարտուղար Էդվարդ Միլիտոնյանը, ԳՄ նախագահի ընտրության նախաշեմին Վանաձոր իր այցի նպատակը ներկայացնելով` ասաց, որ գրող Սերո Անտոնյանի մահվան արարողությանն է մասնակցել, որից հետո որոշել է հանդիպել վանաձորցի գրողների հետ:
Գրողների միության նախագահի առաջիկա ընտրությունների մասին Միլիտոնյանն ասաց, թե հաջորդ շաբաթ ԳՄ-ում նիստ կհրավիրվի, կորոշվի ընտրության օր, բայց չի կարծում, թե այդ նիստի ժամանակ թեկնածություններ քննարկվեն: Իր առաջադրման և հնարավոր ընտրության մասին էլ ասաց. «Դե էդ հետո, հետո էդ ամեն ինչի մասին կխոսենք մանրամասն»: Վանաձորցի գրողների հետ նրա հանդիպումը, սակայն, թաքնված քարոզչական բնույթ էր կրում:
Էդվարդ Միլիտոնյանը ներկայացրեց ԳՄ-ի դերը, հնարավորությունները գրողի ստեղծագործական և անձնական կյանքում, հատկապես՝ սոցիալական խնդիրների լուծման ուղղությամբ: Նրա խոսքով` եզակի երևույթ է, որ վերջին 10 տարում բոլոր գրողների, հիմնականում` վանաձորցիների ստեղծագործությունները տպագրվել են: «Միությունը ունի հնարավորություններ հրատարակչական, ստեղծագործական, հանգստանալու, բարոյական, հեղինակային իրավունքի: Սրանք հարցեր են, որ ինքը գրողը կարող է չկարողանա իրեն պաշտպանել, և միությունը ավելի օգտակար կլինի այս հարցերում: Նաև չմոռանանք սոցիալական խնդիրները, որ միությունը լուծել է բազմիցս: Իմ ծրագրերի մեջ կա, որ արել ենք, փորձը գիտենք, և ավելի երևի շրջանակը մեծ կլինի առաջիկայում, նպատակային ուրեմն գործողություններով, հատկապես մեր մամուլին հոգատար լինելու, նաև հրատարակչական խնդիրներ, թարգմանական»,- ասաց Է. Միլիտոնյանը: Նա նաև նշեց, որ իր ծրագրային դրույթներից է մարդկանց վաստակը գնահատելը: «Մարդկանց վաստակը գնահատելը ես նաև համարում եմ շատ կարևոր: Ինչ ուզում է լինի՝ պիտի գնահատվի»,- վանաձորցի գրողներին հավաստիացրեց Է. Միլիտոնյանը:
Վանաձորցի գրողներն ապագա ԳՄ նախագահի թեկնածուի ուշադրությունը հրավիրեցին մի շարք խնդիրների վրա, օրինակ, ըստ նրանց, գրական մամուլում տպագրվող գործերի համար արժանապատիվ հոնորար ստանալու հնարավորություն պետք է ստեղծել:
