Грузия Online-ի փոխանցմամբ՝ Վրաստանում ԵՄ ներկայացուցչության ղեկավար Ֆիլիպ Դիմիտրովը Վրաստանում ԵՄ գրասենյակում այսօր ներկայացրել է Վրաստանի ու ԵՄ-ի համագործակցության պլանի 4-րդ միջանկյալ զեկույցը։ 12 երկրների, այդ թվում՝ նաև Վրաստանի վերաբերյալ «Եվրոպական հարևանության քաղաքականության» զեկույցները հրապարակվել են մայիսի 26-ին Բրյուսելում։
Վրաստանին առնչվող զեկույցում արտացոլված են 2010 թվականին «Եվրոպական հարևանության քաղաքականության» շրջանակներում մշակված Վրաստանի «Գործողությունների պլանը»։
Դիմիտրովի խոսքերով, Վրաստանի վերաբերյալ զեկույցում նշված է, որ Վրաստանն ընդհանուր առմամբ առաջընթաց է գրանցել այդ պլանում նշված առաջնահերթ խնդիրների իրագործման հարցերում։ Դա մասնավորապես վերաբերում է դատական համակարգի բարեփոխումներին, ընտրությունների անցկացման միջոցառումների բարելավմանը, կանանց իրավունքների մեծացմանը, սահմանադրական բարեփոխումների անցկացմանը, առևտրի ու բիզնեսի ոլորտի բարեփոխումներին, տարածաշրջանային զարգացմանը, ինչպես նաև վարչական կոռուպցիայի զգալի կրճատմանը։
Այս առումով նշվում են 2010 թվականի մայիսի 30-ին անցկացված տեղական ինքնակառավարման մարմինների ընտրությունը և քրեական պատասխանատվության ենթարկելու տարիքը 12-ից 14-ի հասցնելը։
Չնայած դրան, Վրաստանում դեռևս գոյություն ունեն էլիտարային կոռուպցիայի որոշ դեպքեր, որոնց դեմ վրացական իշխանությունները պետք է պայքարեն։
Դիմիտրովը նաև նշել է զեկույցում տեղ գտած այն ուղղությունները, որոնք բարեփոխման կարիք են զգում։ Վրաստանը պետք է ակտիվացնի ժողովրդավարության համախմբումը, ինչը մասնավորապես վերաբերում է քաղաքական ու ԶԼՄ-ների բազմակարծությանը։ Բացի այդ, խնդիրներ կան ազգային փոքրամասնությունների իրավունքների ու ինտեգրման հարցերում։
Վրաստանը պետք է նաև պայքարի կոռուպցիայի դեմ և շարունակի գործազրկության մակարդակի նվազեցման և աղքատության հաղթահարման ուղղությամբ տարվող ջանքերը։
Դիմիտրովը նաև ընդգծել է, որ ԵՄ-ն աջակցում է Վրաստանի տարածքային ամբողջականությունը։
Հիշեցնենք, որ Վրաստանը «Եվրոպական հարևանության քաղաքականության» մեջ ներառվել է 2004 թվականի նոյեմբերի 14-ին։ «Գործողությունների պլանն» իրենից ներկայացնում է մի քաղաքական փաստաթուղթ, որում հստակեցվում են ԵՄ-ի ու Վրաստանի համագործակցության ռազմավարական առաջադրանքները։