Երեկ խորհրդարանում «Ժառանուգություն» խմբակցության անդամ Զարուհի Փոստանջյանը հայտարարել է, որ ՀՀ քրեակատարողական հիմնարկները գերբեռնված են, ինչը մեր պետության ռեպրեսիվ մոտեցումների հետևանքն է նաև: Նա ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի տեղակալ, ՀՀԿ-ական պատգամավոր Ռաֆիկ Պետրոսյանին խորհուրդ է տվել հորդորել իրենց նախագահ Սերժ Սարգսյանին՝ համաներում իրականցնել և այդպիսով լուծել գերբեռնվածության հարցը:
Ի պատասխան` Ռաֆիկ Պետրոսյանն ասել է, թե ՀՀ ԱԺ օրակարգում, որքան գիտի, արդեն իսկ մի օրինագիծ կա, որը վերաբերում է Քրեական օրենսգրքի մի շարք հոդվածներով նախատեսված պատժաչափերի մեղմացմանը: Այդ օրինագծի ընդունման պարագայում մոտ 1000 դատապարտյալ վաղաժամկետ ազատ կարձակվի:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը նկատեց, որ վաղաժամկետ ազատ արձակման լծակները հատուկ հանձնաժողովի ձեռքում են գտնվում: Իսկ այդ հանձնաժողովն էլ, ըստ Սաքունցի, շատ սուբյեկտիվ է գործում և անկանխատեսելի: «Այդ հանձնաժողովի գոյությունը հակասահմանադրական է, քանի որ մարդուն պատիժ սահմանում է դատարանը, բայց ազատություն տալիս է հանձնաժողովը: Նրանց մոտեցումներն այնքան խտրական են, որ անգամ դատապարտյալների համար են անհասկանալի այդ չափանիշները»: Սաքունցը տեղեկացրեց, որ այժմ ՔՕ-ի որոշ հոդվածների փոփոխություն է նախատեսվում, որով փոքր հանցագործությունների դեպքում ազատազրկումը փոխարինվում է դրամական տուգանքով կամ պայմանական այլ պատժով: Նրա խոսքերով, եթե այդ փոփոխությունները հունվարի 1-ից ուժի մեջ մտնեն, քրեակատարողական հիմնարկներն ահագին կբեռնաթափվեն:
