Ռուսաստանի քաղաքական և ռազմական վերլուծությունների ինստիտուտի ղեկավար, պահեստազորի գնդապետ Անատոլի Ցիգանոկի գնահատմամբ, Վլադիմիր Պուտինին Միացյալ Նահանգներ հրավիրելու փաստը երկու կարևոր հարցի հետ է կապված: Նրա գնահատմամբ, նախ Միացյալ Նահանգները ցանկանում է հստակեցնել Պուտինի դիրքորոշումները, իսկ երկրորդ խնդիրն էլ կապված է «Եվրո-Պրո» նախագծի հետ:
Ինչ վերաբերում է այն դիտարկումներին, թե Պուտինը իր վրա պարտավորություն է վերցրել, որ նախագահ դառնալով կանի ամեն բան ԼՂ հարցում առաջընթաց արձանագրելու հարցում, Ցիգանոկը պատասխանեց. «Անկախ նրանից՝ Ռուսաստանի նախագահ կլինի Մեդվեդևը, թե Պուտինը, թե ինչ քայլեր կիրականացնեն ռուսներն ու ամերիկացիները, ԼՂ հարցը ներկա փուլում չի լուծվի»:
Ցիգանոկի խոսքերով, ԼՂ հարցի լուծումն անիրական է, մինչև չանցնի մեկ սերնդի կենսական ցիկլ. «Անկախ Հայաստանի և Ադրբեջանի միջև ընթացող բանակցություններից, անկախ նրանից՝ կմասնակցի, թե ոչ հակամարտության երրորդ կողմը, չի լինի որևէ հաջողություն»: