«Ընդդիմությունն իր մեղքն այնքանով ունի, որ թույլ է տվել՝ ձևավորվի այնպիսի լկտի իշխանություն, որը կարող է Երևանի կենտրոնում գնդակահարել ժողովրդին»,- հարցին, թե՝ ընդդիմությունը տեսնո՞ւմ է իր մեղքը 2008 թ. մարտի 1-ի դեպքերում, պատասխանեց «Հայկական ժամանակ» օրաթերթի գլխավոր խմբագիր Նիկոլ Փաշինյանը:
Նա նշեց, թե ՀԱԿ-ի նպատակն է, որ իշխանությունները ոչ միայն ձևավորվեն ազատ և արդար ընտրությունների արդյունքում, այլև իշխանությունները նման ընտրություններով իրենց տեղը զիջեն մյուսներին՝ իրենց հակառակորդներին, որ ընտրություններում պարտված նախագահն ինքը առաջինն ընդունի իր պարտությունը և զանգի ու շնորհավորի իր հաջորդին:
Փաշինյանը նկատեց, որ եթե Սերժ Սարգսյանն ընդունի ընդդիմության առաջարկները, ապա իրենք ունեն համապատասխան քայլերը, եթե չընդունի, այդ դեպքում ևս ունեն համապատասխան քայլեր: Այդուամենայնիվ, Փաշինյանի խոսքերով, իշխանությունները վերջերս արթնացած ռեալիզմի ճանապարհով կգնան և կհասկանան, որ արտահերթ նախագահական ընտրություններն են այն միակ ճանապարհը, որի միջոցով հնարավոր կլինի դուրս գալ Հայաստանում ստեղծված քաղաքական և համակարգային ճգնաժամից:
Իսկ այն աարցին, թե ինչ տարբերություն կա Սերժ Սարգսյանի և Ռոբերտ Քոչարյանի միջև Փաշինյանը պատասխանեց. «Ռոբերտ Քոչարյանի և Սերժ Սարգսյանի միջև ոչ մի տարբերություն չկա, տարբերությունը 2006 և 2011 թվականների Հայաստանի մեջ է»: