Այսօր Ռուսաստանի արտգործնախարար Սերգեյ Լավրովը կարծիք է հայտնել, որ ապակայունացումը Սիրիայում աղետներ կբերի ողջ տարածաշրջանին: «Ես համաձայն եմ այն կարծիքի հետ, որ Սիրիան առանցքային երկիր է, և որ Սիրիան ապակայունացնելու բոլոր փորձերը կարող են աղետալի հետևանքներ ունենալ: Մենք պնդում ենք, որ որքան հնարավոր է՝ արագ պետք է կատարվեն բարեփոխումներ, որոնց մասին խոսում էր նախագահ Ասադը, դրանք պետք է կյանքի կոչել»,- ասել է Լավրովը:
Լավրովն անդրադարձել է նաև այդ երկրի ընդդիմությանը: Նա հիշեցրել է, որ ՌԴ նախագահ Դմիտրի Մեդվեդևը երկու անգամ խոսել է Սիրիայի նախագահի հետ. «Մենք պետք է վստահ լինենք, որ զսպվածության կոչերը պետք է ուղղվեն ոչ միայն Սիրիայի իշխանություններին, այլ նաև ընդդիմությանը, որն ունի բավական շատ զինված խմբեր, որոնք գործում են բավական հանդուգն»,- ասել է ռուսաստանցի նախարարը:
Հիշեցնենք, որ երեկ Սիրիայի ընդդիմությունը հավաքվել է թուրքական Անթալիայում հետագա քայլերը մշակելու և ավելի կազմակերպված գործելու համար: