Շուտով կբացվի ակտիվ ամառային հանգստի սեզոնը, և քաղաքային տապից փախչելով՝ մարդիկ կմեկնեն հանգստի գոտիներ։ «Ո՞ւր գնալ» հարցին շատերը անկասկած կպատասխանեն՝ Սևանա լիճ։
«Առաջին լրատվականը» փորձեց պարզել, թե ինչ վիճակում է գտնվում Սևանի ավազանը, և ինչ քայլեր են արվում հանգստի սեզոնին ընդառաջ։ Մեզ հետ զրույցում Սևանի բնապահպանական տեսչության պետի նախկին տեղակալ Հենրիկ Մարտիրոսյանը հայտնեց, որ Սևանի ավազանի վիճակը շարունակում է մտահոգիչ մնալ։ «Կառավարության կողմից կատարվում է հանցագործություն Սևանի հանդեպ։ Լճի ջրերը բարձրանում են, Սևանի գոտու մոտ 16 հա անտառներից 3 հա անցել է ջրի տակ։ 2006 թվից մինչ հիմա կտրվել է 12,000 ծառ»,- հայտնում է Հենրիկ Մարտիրոսյանը։
Հիշեցնենք, որ 2010 թ. Սևանի մաքրում անցկացնելու համար պետբյուջերից հատկացվել է 257 միլիոն դրամ։ 2006-2010 թթ. ջուրը մաքրելու համար հատկացվել է 416 միլիոն դրամ։
«Այսքան գումար շորթվել է։ Բացի այդ, 12,000 ծառերի հատումը, վառելանյութի և կահույքանյութի վաճառքը մոտավոր հաշվարկներով տվել է 31 միլիոնի եկամուտ, այս գումարի ճակատագիրը ևս հայտնի չէ»,- ասում է Հենրիկ Մարտիրոսյանը։
Անհանգստացնող է նաև Սևանի ափին հանգստի գոտիներ ստեղծող գործարարների վիճակը։ Մարդիկ վարձակալում են տարածքը, մեծ գումարներ են ծախսում լողափերը օրինական գրանցելու համար։ Սակայն դեռ չեն հասցնում կատարված ծախսերի դիմաց եկամուտ ստանալ, ջրի մակարդակը բարձրանում է, և արած գործն անցնում է ջրի տակ։
Հիշեցնենք, որ Սևանում գործող հանգստի սպասարկում իրականացնող 2000 կազմակերպություններից միայն 460-ն է օրինական։
Այս տարվա պետբյուջեի պլանով Սևանի ավազանում մաքրությունների համար նախատեսված է ևս 124 միլոն դրամ։ Սակայն, ինչպես տեղեկացնում է Հենրիկ Մարտիրոսյանը, դեռ աշխատանքներ չեն սկսվել։
