Կառավարության այսօրվա նիստում վարչապետ Կարեն Կարապետյանը թվային օրակարգի մշակման ու իրագործման վերաբերյալ հանձնարարական տվեց։
«Կառավարության հնգամյա ծրագրով սահմանված են թվային օրակարգից բխող մի շարք համալիր միջոցառումներ՝ հստակ ժամկետներով, այդ թվում՝ պետական և մասնավոր հատվածների համագործակցության, թվային ռազմավարության ու գործողությունների ծրագրի ընդունմամբ»,- ասաց վարչապետը։
Կարեն Կարապետյանի խոսքով՝ թվային օրակագի շրջանակներում արդեն իսկ ձևավորվել է թվային զարգացմանն աջակցող խորհուրդ ու մշակման փուլում է գտնվում միասնական թվայնացված միջավայրի իրագործման ծրագիրը։
«Մենք պետք է ունենանք մի կենտրոն, որը կկանոնակարգի ամբողջ մեր քաղաքականությունը», – ընդգծեց վարչապետը։
Վարչապետը կառավարության աշխատակազմի ղեկավարին հանձնարարեց 15-օրյա ժամկետում ներկայացնել առաջարկությունների փաթեթ՝ պետական կառավարման ու տեղական ինքնակառավարման, էլեկտրոնային համակարգերի զարգացման քաղաքականության համակարգման, մասնագիտացված օղակի ձևավորման վերաբերյալ։