Պահպանելով բարձր գնաճ նախորդ տարվա նույն ժամանակաշրջանի համեմատ՝ այս տարվա մայիսին ապրիլի նկատմամբ գնաճ չի արձանագրվել, իսկ նախորդ տարվա դեկտեմբերի համեմատ՝ աճել է 5%-ով՝ ինչպես և ապրիլ ամսին էր։ Այս հանգամանքը այսօր լրագրողների հետ հանդիպման ժամանակ ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը դրական գնահատեց։
Խոսելով Ռուսաստանի կողմից ցորենի արտահանման արգելքի վերացման մասին՝ նա նշեց, որ դա կթուլացնի գնաճային ճնշումները մեր երկրում։ Հարցին, թե միջազգային շուկայում ցորենի գնի նվազումը կնվազեցի՞ արդյոք Հայաստանի ներսում դրա գինը՝ հաշվի առնելով այս շուկայի մոնոպոլացվածության հանգամանքը, Գ. Մինասյանը պատասխանեց, որ դա տնտեսական մրցակցության պաշտպանության հանձնաժողովին վերաբերող հարց է։
«Մենք ոչ միայն արգելում ենք գների չհիմնավորված բարձրացումը, այլև գների չհիմնավորված պահպանումը։ Եվ Տնտեսական մրցակցության պաշտպանության հանձնաժողովը իրավասու է այդպիսի իրավիճակի պարագայում հարուցել գործ այդ տնտեսվարող սուբյեկտների նկատմամբ և տուգանել։ Ի տարբերություն նախորդ ժամանակների, երբ տուգանքը վերաբերելու էր միայն նրա շրջանառությանը, մրցակցության պաշտպանության բնագավառի օրենսդրության վերջին փոփոխությունների շնորհիվ, այժմ այդ տուգանքը կվերաբերի նաև այն ամբողջ շահույթին, որը տնտեսվարողն ստացել է օրենսդրության խախտման հետևանքով։
Սա բավականին լուրջ լծակ է և եթե մի քանի անգամ կիրառվի, այսինքն՝ խախտման արդյունքում ստացված ողջ շահույթը գնա պետական բյուջե, ապա սա լուրջ կազդուրիչ ազդեցություն կթողնի այդ սուբյեկտների վրա»,- ասաց Գ. Մինասյանը։