ՀՀ ԱԳՆ մամոլ գրասենյակից «Առաջին լրատվական»-ին հայտնում են, որ սեպտեմբերի 22-ին Քուվեյթի «Մարինա» հյուրանոցի «Սալվա Սաբահ» սրահում տեղի է ուենցել Քուվեյթում ՀՀ դեսպանության կազմակերպած պետական ընդունելությունը` նվիրված ՀՀ Անկախության 22-ամյա տարեդարձին: Հրավիրյալների թվում էին Քուվեյթի արտգործնախարարության, տեղական իշխանությունների և գործարար շրջանակների, կառավարող «Ալ-Սաբահ» ընտանիքի ներկայացուցիչներ և անդամներ, երկրում հավատարմագրված դիվանագիտական առաքելությունների ղեկավարներ, պատգամավորներ, հասարակական-քաղաքական գործիչներ, մտավորականներ, տեղական լրատվամիջոցների և հեռուստաընկերությունների, ինչպես նաև քուվեյթահայ համայնքի ներկայացուցիչներ: Ընդունելության գլխավոր հյուրն է եղել Քուվեյթի Պետության առևտրի և արդյունաբերության նախարար Անես Խալեդ Ալ-Սալեհը: Ընդունելությունը նշանավորվել է Քուվեյթի Պետության մայրաքաղաքի` Էլ- Քուվեյթ նահանգի նահանգապետ շեյխ Ալի Ջաբեր ալ-Սաբահի և Ալ-Ահմադի նահանգի նահանգապետ Դր. Իբրահիմ Ալ-Դուայիջի մասնակցությամբ:
Երկու երկրների օրհներգերը հնչելուց հետո ներկաներին ուղղված իր խոսքում Քուվեյթում ՀՀ դեսպանը խոսել է Հայաստան – Քուվեյթ երկկողմ հարաբերությունների ներկա ընթացքի և անկնկալվող ծրագրերի մասին, անդրադարձել Քուվեյթի Պետության հետ տարբեր ոլորտներում կատարված աշխատանքներին և փոխգործակցության խորացման հեռանկարներին, ներկայացրել է ՀՀ արտաքին քաղաքականության առաջնահերթություններն ու բարձր գնահատել քուվեյթահայ համայնքի դերը երկու երկրների միջև հարաբերությունների կամրջման գործում:
Պետական ընդունելությունն ամբողջացել է ժամանակակից հայ արվեստի ստեղծագործությունները ներկայացնող ցուցահանդեսով և Հայաստանի վերաբերյալ տեսահոլովակի ցուցադրմամբ:
Քուվեյթում ՀՀ դեսպանության կազմակերպած ընդունելությունը լայնորեն լուսաբանվել է տեղական լրատվամիջոցներում և Քուվեյթի պետական հեռուստատեսությամբ: Առանձին լրատվամիջոցներ անդրադարձել են առևտրի և արդյունաբերության նախարարի և երկու նահանգապետերի բարձր ներկայությանը:
