Սեպտեմբերի 14-ի լույս 15-ի գիշերը մարտական դիրքերից մեկում ժամկետային զինծառայող Տիգրան Մելիքի Հակոբյանի կողմից արձակված կրակոցների հետևանքով մահացած զինծառայող Խաչատուր Կորյունի Խաչատրյանի մայրը՝ Տիկին Ասիան, պատմում է մանրամասներ:
1994թ. ծնված Խաչատուր Կորյունի Խաչատրյանը բանակում ինն ամսիներին ծառայության ընթացքում ծառայությունից ընդհանուր առմամբ գոհ է եղել, սակայն ծառայության ընթացքում երբեմն ընկճվում էր, երբեմն նորմալ տրամադրություն ունենում:
«Հարցրել եմ պատճառը, ասել է՝ կարոտում եմ, դրա համար է այդպես, բայց ես պրոբլեմ չունեմ»,- ասել է Խաչատուրը մորը:
Շրջանառվող վարկածը, թե որդին նամակ է գրել Սեյրան Օհանյանին իրեն այլ զորամաս տեղափոխելու համար, Խաչատուրի մայրը հերքում է: «Առաջին լրատվական»-ի հետ զրույցում նա նշեց, որ ինքը, որպես մայր, ցանկություն է ունեցել գրել, ինչ-որ առումով օգտակար լինել տղային, որ հնարավորության դեպքում տեղափոխեին որդուն այլ զորամաս:
Որդին որևէ այլ բան չի ասել մորը, պարզապես մի քանի անգամ ասել է՝ եթե կարող ես, տեղափոխի: «Ասել եմ՝ ցավդ տանեմ, կաշխատեմ ինչ-որ բան անել. ցանկացած ծնող ուզում է իր երեխային օգնել: Նամակը գրել էի, կիսատ էր, դեռ չէի հասցրել տանել: Նախարարին գրել էի, որ եթե հնարավոր է՝ երեխայիս տեղափոխեն այլ զորամաս ծառայությունը շարունակելու համար: Գուցե բանակի մասին իր պատկերացումները մի փոքր այլ էին, դրա համար ինքը մտածում էր ուրիշ զորամասում ուրիշ կլինի ծառայությունը, ամեն դեպքում, 18 տարեկան երեխա էր դեռ: Նա նոր-նոր պետք է կյանք մտներ, սովորեր՝ կյանքն ինչ բան է»,- հուզված ասաց տիկին Ասիան՝ հավելելով, որ բոլորին խնդրում է իր երեխայի անունը չշահարկել, սուտ տեղեկատվություն չտարածել:
«Ինձ ճշմարտությունն է անհրաժեշտ: Դեպքից մեկ օր առաջ ես հեռախոսով խոսել եմ իր հետ, զրուցել եմ, նրա տրամադրությունը նորմալ է եղել, առանձապես ոչ մի դժգոհություն չի ունեցել: Ինձ համար հանելուկ է, ես պետք է մինչև վերջ գնամ, հաստատ իմանամ՝ ինչ կատարվեց իմ երեխայի հետ: Ես թույլ չեմ տա ոչ մեկին՝ իմ երեխայի անունը արատավորի: Հարցրեք իմ երեխաներին, ինձ ճանաչողներին, թող ասեն՝ ինչ ծնող եմ ես, ինչ երեխաներ են իմ երեխաները: Իմ երեխաներն այլ դաստիարակություն են ստացել, փողոցի հետ կապ չեն ունեցել»,- ասաց մայրը՝ ավելացնելով, որ ինքը հետևողական է լինելու գործի բացահայտման համար, պետք լինի՝ մինչև Եվրադատարան կդիմի:
Մայրը պատմեց, որ որդին բանակ գնացել է մեծ սիրով, այլապես եթե բանակից փախչող լիներ, Ռուսաստանից հետ չէր գա բանակ գնալու համար:
«Օրինակ՝ երեխաներ կան, որոնք ուղիներ են փնտրում խուսափելու ծառայությունից, բայց իմ երեխան երբեք նման բան չի մտածել: Ինքը հետաքրքրվում էր ազատամարտով, ազատամարտիկներով, ցանկացած հերոս ազատամարտիկից ավելի նվիրված էր: Եթե որևէ բանից դժգոհություն ունենար, առաջին մարդը ես էի, որին կասեր»,- ասաց նա:
Տիկին Ասիան հեկեկալով ասաց, որ չի կարող հաշտվել որդու չգոյություն հետ և չի պատկերացնում, որ այլևս նրան չի կարող տեսնել…
Հիշեցնենք, որ դեպքի առթիվ երեք զինծառայողների նկատմամբ մեղադրանք է առաջադրվել: Տիգրան Հակոբյանի նկատմամբ մեղադրանք է առաջադրվել Քրեական օրենսգրքի 365-րդ հոդվածի 3-րդ մասով՝ «մարտական հերթապահության կամ մարտական ծառայություն կրելու կանոնները խախտելը», և որպես խափանման միջոց ընտրվել է կալանավորումը:
Երկու հոգու նկատմամբ նույնպես մեղադրանք է առաջադրվել. ավագ սերժանտ Արթուր Զոհրաբյանին՝ Քրեական օրենսգրքի 375-րդ հոդվածի 1-ին մասով՝ «պետի (հրամանատարի) կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը», սերժանտ Արթուր Մարտիրոսյանին մեղադրանք է առաջադրվել Քրեական օրենսգրքի 365-րդ հոդվածի 2-րդ մասով՝ «մարտական հերթապահություն կամ մարտական ծառայություն կրելու կանոնների նկատմամբ անփույթ կամ անբարեխիղճ վերաբերմունքի հետևանքով և առաջացրել է էական վնաս»:
