Հազարամյակի մարտահրավերներ ծրագիրը կավարտվի 2011 թ. սեպտեմբերին: Այս մասին այսօր հայտարարեց ԱՄՆ պետդեպարտամենտի Եվրոպական և Եվրասիական երկրներին ամերիկյան օժանդակության համակարգող Դենիել Ռոզենբլումը հայ-ամերիկյան միջկառավարական հանձնաժողովի նիստից հետո: «Դուք գիտեք, որ նախնական ծրագրի ոչ բոլոր հոդվածներն են, որ իրականացվեցին: Այսօր մենք այդ մասին էլ խոսեցինք: Եվ այն ծրագրերի համար, որոնք նախատեսված էին, բայց չիրականացվեցին Հազարամյակի մարտահրավերներով, Հայաստանի կառավարությունը փորձում է գտնել ֆինանսավորման այլ ուղիներ»,- ասաց Ռոզենբլումը` անդրադառնալով այն հարցին, թե ինչ ճակատագրի արժանացան ՀՄ-ով նախատեսված, բայց նախագահական ընտրություններից հետո սառեցված ծրագրերը: Իր հերթին, ՀՀ էկոնոմիկայի նախարար Ներսես Երիցյանն ասաց, որ ՀՄ-ի այն մասը, որը չիրականացվեց այդ ծրագրով, իրականացվել է հիմնականում Համաշխարհային բանկի ֆինանսավորման հաշվին: «Կառավարությունը եղած ֆինանսավորման շրջանակներում ամբողջությամբ իրականացրել է այն ծրագրերը, որոնք մենք նախատեսել էինք ՀՄ-ի շրջանակներում»,- ասաց Ն. Երիցյանը:
