Վրաստանի կողմից ԱՀԿ-ին Ռուսաստանի անդամակցությունն արգելափակելու հնարավորությունը պահպանվում է, սակայն Մոսկվան այդ հարցում ակնկալում է մյուս երկրների օգնությունը,- հայտարարել է ՌԴ նախագահի օգնական Արկադի Դվորկովիչը. տեղեկացնում է Грузия Online-ը:
«Խնդիրն առայժմ մնում Է»,- ասել է նա: Սակայն ըստ նրա. «Բոլորը, ովքեր շահագրգռված են ԱՀԿ-ին Ռուսաստանի միանալու հարցում, կօգնեն նրան այդ գործում»,- նշել Է Դվորկովիչը: Նա հավելել է, որ ԱՄՆ նախագահ Բարաք Օբաման այդ հարցը բարձրացրել և նշել է ԱՀԿ-ին ՌԴ-ի անդամագրվելու ճանապարհին խոչընդոտների թվում: «Առայժմ Վրաստանը պաշտոնապես չի հայտարարել, որ ցանկանում է առաջադրել այդ հարցը, և ոչ էլ պաշտոնական փաստաթղթեր են ուղարկվել»,- ասել Է Դվորկովիչը: Ավելի վաղ ԱՄՆ նախագահի տնտեսական խորհրդական Լորենս Սամերսը լրագրողներին հայտնել էր, թե Մոսկվան և Վաշինգտոնը հուսով են, որ Վրաստանի դիրքորոշումը խոչընդոտ չի դառնա Առևտրի համաշխարհային կազմակերպությանը ՌԴ-ի անդամակցելու համար: «Մենք ընդունել ենք այնպիսի որոշումների անհրաժեշտությունը, որոնք կօգնեն թույլ չտալու, որ Վրաստանի իրադրությունը խոչընդոտ դառնա Ռուսաստանի ինտեգրման համար»,- ասել է Սամերսը: Իր հերթին, ՌԴ տնտեսական զարգացման նախարար Էլվիրա Նաբիուլինան հայտարարել է, որ Ռուսաստանն առայժմ պաշտոնական ոչ մի ծանուցում չի ստացել Վրաստանից, որն ավելի վաղ հայտարարել էր, թե չի պաշտպանի ԱՀԿ-ին անդամակցելու ՌԴ-ի հայտն այնքան ժամանակ, քանի դեռ Մոսկվան վրացի մաքսավորներին թույլ չի տալիս մտնել Աբխազիայի և Հարավային Օսիայի տարածք:
