«Վրաստանը երբեք թույլ չի տա, որ Հայաստանը մեկուսանա: Մենք ո՛չ ընկերներին, ո՛չ թշնամիներին երբեք թույլ չենք տվել ձևավորել Վրաստանի քաղաքականությունը: Մենք բաց հայտարարել ենք, որ Հայաստանի հետ բարեկամներ ենք, և որևէ այլ երկիր, ինչքան էլ որ թշնամական հարաբերությունների մեջ լինի Հայաստանի հետ, չի կարող ազդել հայ-վրացական հարաբերությունների վրա: Որևէ մեկուսացման մասին խոսք անգամ գնալ չի կարող, դա հնարավոր չէ»,- պատասխանելով «Առաջին լրատվականի» հարցին, թե Բաքու-Թբիլիսի-Կարս երկաթուղու շինարարությամբ Վրաստանը կարո՞ղ է մասնակցել Հայաստանին մեկուսացնելու ծրագրին, կարծիք հայտնեց ՀՀ-ում Վրաստանի արտակարգ և լիազոր դեսպան Թենգիզ Շարմանաշվիլին:
Հիշեցնենք, որ Վրաստանի ենթակառուցվածքների նախարարի Բաքու այցի ընթացքում քննարկվել է երկաթուղու շինարարության հարցը, և նախատեսվում է 2012-ի երկրորդ կեսին այն գործարկել: Դեսպանը հավանական համարեց երկաթուղու շինարարությունը մինչև 2012 թ. երկրորդ կեսն ավարտելը և տեղեկացրեց, որ մեծ ներդրումներ են արված՝ ավելի քան 500 մլն դոլար է հատկացված այդ ծրագրի համար: Դեսպանի տեղեկացմամբ, այն հիմնականում օգտագործվելու է Թուրքիա և այնտեղից Եվրոպա նավթ և նավթամթերք տեղափոխելու համար. «Սա եվրոպական նախագիծ է և տնտեսական առումով շատ հեռանկարային ծրագիր»:
Այդուամենայնիվ, Շարմանաշվիլու պնդմամբ, այդ տնտեսական հարաբերությունների համար Վրաստանը հարցականի տակ չի դնի Հայաստանի հետ հարաբերությունները. «Մենք դա մի քանի անգամ ենք ապացուցել և անգամ այն տարիներին, երբ Վրաստանում քաոս էր և նորմալ իշխանություններ էլ չկային»:
Դեսպանը հավելեց, որ այս երկաթուղուց կարող է օգտվել նաև Հայաստանը. «Վրաստանի տարածքում և նրա իրավական ոլորտում գտնվող երկաթգիծը կարող են օգտագործել բոլորը, դա լինելու է տնտեսապես բաց գոտի և կարող են օգտվել տնտեսական այն բոլոր սուբյեկտները, որոնք Վրաստանի հետ համապատասխան պայմանագիր կկնքեն»: