Արցախի Հանրապետության արտգործնախարարի նախկին տեղակալ, Արցախի նախագահի հատուկ հանձնարարություններով դեսպան Մասիս Մայիլյանը մեծ ակնկալիքներ չունի ԵԱՀԿ Մինսկի խմբի հերթական այցելությունից տարածաշրջան:
ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ռիչարդ Հոգլանդը (ԱՄՆ) և Ստեֆան Վիսկոնտին (Ֆրանսիա) նախատեսված տարածաշրջանային այցի շրջանակում հունիսի 10-ին Երևանում հանդիպում կունենան ՀՀ նախագահի, պաշտպանության և արտաքին գործերի նախարարների հետ: Երևանից համանախագահները մեկնելու են Ստեփանակերտ, իսկ այնուհետև լինելու են Ադրբեջանի մայրաքաղաքում՝ Բաքվում:
«Առաջին լրատվական»-ի հետ զրույցում խոսելով համանախագահների այցի մասին՝ Մասիս Մայիլյանը կարծիք հայտնեց, որ միջնորդներն ըստ երևույթին ճշտելու են կողմերի դիրքորոշումները, ծանոթանալու են իրավիճակի հետ:
«Համանախագահների այցը հետաքրքիր է հատկապես իրենց վերջին հայտարարությունից հետո, որը հասցեական էր: Նաև սպասելիքներ չկա այն առումով, որ մոտ ժամանակներս պիտի փոփոխություններ լինեն համանախագահների կազմում: Հավանաբար նրանք ավելի արդյունավետ կսկսեն աշխատել այն ժամանակ, երբ Մինսկի խմբի նոր կազմ կլինի, որովհետև այս կազմից երևի միայն Պոպովը կմնա, իսկ ամերիկացի և ֆրանսիացի համանախագահները, ինչպես Ռուսաստանի արտգործնախարարն է ասել, փոխարինվելու են»,- մեկնաբանեց Մասիս Մայիլյանը:
Փորձագետի խոսքերով՝ համանախագահներն անկախ ամեն ինչից ջանքեր են գործադրում զինված հակամարտության վերսկսումը կամ հրադադարի խախտումները կանխելու ուղղությամբ, իսկ պատերազմի վերսկսման մասին խոսակցությունները լրատվական դաշտում ակտիվացել են Միջազգային ճգնաժամային խմբի (ICG) վերջին զեկույցի հրապարակումից հետո: Ասելով, որ ճգնաժամային խմբի փորձագետները մտահոգություն են հայտնել հակամարտության գոտում ստեղծված վտանգավոր իրադրության կապակցությամբ, Մայիլյանը միաժամանակ նկատեց, որ ճգնաժամային խումբը դեռևս 2006 թվականից սկսած մշտապես կանխատեսում է նոր պատերազմ, բայց լայնածավալ ռազմական գործողություններ եղան միայն 2016 թվականի ապրիլին:
«Ես համամիտ եմ այն կարծիքի հետ, որ նման գնահատականներն ավելի շատ ուղղված են արտաքին խաղացողներին, որպեսզի միջնորդներն ավելի ակտիվ աշխատեն և ավելի մեծ ուշադրություն դարձնեն այս հակամարտությանը: Բայց ընդհանուր առմամբ, եթե համեմատենք ապրիլից առաջ և հիմա, ապա այսօր պատերազմի վերսկսման հավանականությունը ավելի քիչ է, որովհետև ուժերի բալանս է ստեղծվել: Արցախի կողմից ինժեներական կառույցների ստեղծումը, առաջնագծի տեխնիկական հագեցումը, նաև նոր զինտեխնիկայի ձեռքբերումը բալանս են ստեղծել, որը նվազեցնում է պատերազմի վերսկսման հնարավորությունը»,- ավելացրեց Մասիս Մայիլյանը:
