Թուրքիայի կառավարության և Քրդստանի աշխատավորական կուսակցության (PKK) միջև հաշտությունը սպառնալիքի տակ է: PKK-ում հայտարարել են խաղաղ գործընթացի դադարեցման մասին այնքան ժամանակ՝ մինչև իշխանությունները չհաստատեն քուրդ փոքրամասնության իրավունքների ընդլայնման փաթեթը: Այս պայմաններում կառավարությունը ստիպված է զիջումների գնալ և բարեփոխումներ կատարել: Մանավանդ, որ այդ հաշտեցումը շատ կարևոր է վարչապետ Ռեջեփ Թայիփ Էրդողանի համար, ով պատրաստվում է 2014-ի նախագահական ընտրություններին առաջադրել իր թեկնածությունը:
PKK առաջնորդներից Ջեմիլ Բայիկի հայտարարությունը՝ Թուրքիայից քուրդ գրոհայինների դուրսբերումը դադարեցնելու մասին, Անկարայում համարել են վերջնագիր՝ նշում է Kommersnat.ru-ն:
Քրդերը պահանջում են մեծացնել իրենց քաղաքացիական իրավունքները: Իսկ նրանց գլխավոր պահանջն է կալանքից ազատել քուրդ քաղբանտարկյալներին, ովքեր պատիժ են կրում քրդերին կարեկցելու համար:
Թուրքիայում գործող 3713 հակաահաբեկչական օրենքով՝ մեղադրանք է առաջադրվում քրդերին կարեկցելու համար: Դրա շրջանակներում հաջակցություն քրդերի հանրության մեջ կամ մամուլում արտահայտած բոլոր գաղափարները սովորաբար դատարանը համարում է կամ ահաբեկչություն, կամ պետական դավաճանություն: Ուստի Ջեմիլ Բայիկը պահանջել է նաև չեղյալ հայտարարել այդ օրենքը:
