Չինաստանը 2020թ. կգրավի ԱՄՆ-ի` ներկայումս զբաղեցրած 1-ին հորիզոնականը աշխարհի խոշորագույն տնտեսությունների վարկանիշում, իսկ 2030թ. այդ երկրի տնտեսությունը կրկնակի կգերազանցի ամերիկյան տնտեսությանը:
Այսպիսի կանխատեսումներով են հանդես եկել բրիտանական խոշորագույն Standard Chartered Plc. բանկի տնտեսագետները` Ժերար Լիոնի գլխավորությամբ, հայտնում է РБК DAILY-ն:
Նրանց պատրաստած զեկույցում նշվում է, որ չինական տնտեսության բուռն աճին կնպաստի յուանի փոխարժեքի բարձրացումը: Ըստ զեկույցի եզրահանգումների` 2030 թ. ՉԺՀ-ն կունենա համաշխարհային ՀՆԱ-ի 24%-ը` ներկայիս 9%-ի փոխարեն:
Բանկի վերլուծաբանների կարծիքով, ներկայումս համաշխարհային տնտեսության մեջ տեղի է ունենում ուժերի ռազմավարական հավասարակշռության վերաբաշխում. փոխվում են առաջատարները: Արևմուտքի արդյունաբերական երկրներին փոխարինելու են գալիս նոր տնտեսությամբ երկրները` ԲՌՀՉ-ի (Բրազիլիա, Ռուսաստան, Հնդկաստան, Չինաստան) գլխավորությամբ:
Bloomberg գործակալությունը տեղեկացնում է, որ հուլիս-հոկտեմբեր ամիսներին Ճապոնիան արդեն իսկ աշխարհի խոշոր տնտեսությունների վարկանիշում իր՝ երկրորդ տեղը զիջել է Չինաստանին: 2005թ. Չինաստանը գրավել էր Մեծ Բրիտանիայի զբաղեցրած 4-րդ տեղը, 2007-ին` Գերմանիայի գրաված 3-րդ տեղը: Չինաստանի տնտեսությունն այսպիսի արագ աճ է դրսևորում արդեն 30 տարի: