«Նապոլի»-ի հարձակվող Գոնսալո Իգուաինը հայտարարել է, որ իր լեգենդար հայրենակից Դիեգո Մարադոնայի` նեապոլիտանյան ակումբում ունեցած հաջողությունները իր վրա ճնշում չեն գործադրում:
«Ոչ, դա ինձ որևէ կերպ չի ճնշում: Այն, որ Մարադոնան խաղացել է այստեղ ու այդքան մեծ արժեք ունի ակումբի համար, ավելի է մոտիվացնում ինձ:
Ուրախ եմ, որ նա իմ մարզիչն է եղել ու անձամբ եմ շփվել նրա հետ: Երախտապարտ եմ, որ նրա հետ մեկնել եմ Աշխարհի առաջնության: Հիմա ես հարմարվում եմ նոր միջավայրին: Իմ կյանքում նոր ու շատ կարևոր փուլ է սկսվել:
Նեապոլը շատ նման է Արգենտինային, մասնավորապես` Բուենոս Այրեսին: Նման է նրանով, թե ինչպես են այս քաղաքներում ընդունում ֆուտբոլը: Ուրախ եմ, որ այս հիանալի քաղաքում եմ հայտնվել», — ասել է խաղացողը ՈՒԵՖԱ-ի կայքին տված հարցազրույցում:
