Բրիտանական The Times-ի հաղորդմամբ՝ «Մանչեսթեր Յունայթեդ»-ի շոտլանդացի գլխավոր մարզիչ Ալեքս Ֆերգյուսոնն ակումբի ղեկավարությանը խոստացել է, որ նվազագույնը 3 տարով մնալու է թիմի մարզչական ղեկին։
Իր այդ որոշումը հանրահայտ մարզիչը պատճառաբանել է նրանով, որ ցանկանում է մինչև թոշակի գնալը իր թիմի խաղը մոտեցնել «Բարսելոնա»-ի ցուցադրած խաղամակարդակին և ևս մեկ անգամ ճաշակել Չեմպիոնների լիգայում հաղթելու բերկրանքը։
Հիշեցնենք, որ նոյեմբերին բոլորելու է «Մանչեսթեր Յունայթեդ»-ի ղեկին Ալեքս Ֆերգյուսոնի գտնվելու 25-ամյակը:
Այդ քառորդ դարում Ալեքս Ֆերգյուսոնը տպավորիչ արդյունքներ է արձանագրել: Շոտլանդացու գլխավորությամբ «Մանչեսթեր Յունայթեդ»-ը 25 տարում տիրացել է 36 տիտղոսի. 12 հաղթանակ Պրեմիեր լիգայում, 2-ը՝ Չեմպիոնների լիգայում, 9-ը՝ Անգլիայի սուպերգավաթում, 5-ը՝ Անգլիայի գավաթում, 4-ը՝ Անգլիայի լիգայի գավաթում, 2-ը՝ Աշխարհի ակումբային առաջնությունում, 1-ը՝ Գավաթակիրների գավաթում և 1-ը՝ Եվրոպայի սուպերգավաթում:
Այս հաղթանակների թվում կարելի է ընդգծել երեք անընդմեջ հաղթանակները Պրեմիեր լիգայում (2006-2007, 2007-2008, 2008-2009), ինչպես նաև 1998-1999 մրցաշրջանի եռակի հաջողությունը (Անգլիայի չեմպիոն ու գավաթակիր, Չեմպիոնների լիգայի հաղթող):
Ի դեպ, հենց Ֆերգյուսոնի շնորհիվ «Մանչեսթեր Յունայթեդ»-ը Անգլիայի չեմպիոնի տիտղոսների քանակով (19) շրջանցեց անվիճելի առաջատար համարվող «Լիվերպուլ»-ին, որի ակտիվում գրանցված է 18 չեմպիոնություն։
